TIRANE– Për vite me radhë ai nuk rreshti duke kërkuar për vajzën e saj, e cila erdhi në jetë nga një martesë e dështuar. Historia e Fadil Vrionit, 70-vjeçarit nga Tirana është bërë sot pjesë e emisionit ‘Me zemër të hapur’ në ‘News24’. I moshuari tregon në studio se nuk ka hequr dorë prej gati 20 vitesh për të gjetur Ermirën, e cila sipas tij jeton në Itali me familjen e saj dhe sot është 43 vjeçe.

“Pasi u ndava me gruan, shkuam në gjykatë. U ndamë për mospërputhje. U ndamë me mirëkuptim, ndersa shkak u bë një debat me babain tim. Ajo ishte shumë e lidhur me nënën dhe babain e saj. Ne nuk flinim as në një dhomë, unë flija në dysheme. Mund të kem fjet me të 4-5 herë. Nuk vuajta nga divorci, me dy seanca u ndamë. Ajo kërkoi që unë mos ta takoja vajzën. E kam takuar për herë të fundit kur ishte 3 vjeçe. Di që Ermira është martuar me një durrsak. Kur pash sot foton e vajzës, ishte si ëndërr. E imagjinoja të vogël, me flokë të gjata. Djali im i madh ka tentuar që të takohet me vajzën, motren e tij. I ka shkuar djali im edhe Viotelës, ish-gruas time, në shtëpi dhe ajo e ka përzënë. Isha i detyruar që të mos ta takoja, që ish-gruaja ime mos të ndahej nga burri. E ëma e Ermirës është në dijeni që unë e kërkoja. Më ka marrë malli edhe për thonjtë e saj, dhe flokët e zinj”, -tha 70-vjeçari, shkruan ‘BalkanWeb’.

Kaq mjaftoi që emisioni ‘Me zemër të hapur’ të lidhej me vajzën e Fadilit, e cila u bë pjesë e studios me një lidhje live përmes rrjeteve sociale. Ajo tha se deri në moshën 17-vjeçare kishte qenë në Tiranë dhe se babai i saj mund ta kishte takuar. Ajo tha se për babain e saj nuk kishte ndjenja, pasi nuk e njihte.

Pavarësisht këtij qëndrimi, Ermira la një rreze drite në fund të tunelit.

“Faleminderit që u interesuat për mua. E kam të dëgjuar këtë person si emër, por se njoh. Nuk arrij dot të flas përmes telefonit. Kishte shumë mundësi të tjera për të më kërkuar dhe gjetur. Pasi deri në moshën 16-17 vjeçare kam qenë në Tiranë. Kam jetuar prej kohësh tek ‘Rruga Barikadat’. Nuk ekziston lumë, apo det që ndan prindërit nga fëmija. S’kam fjalë më tepër. Çfarë kam për t’i thënë, do doja që t’ja thoja në sy atij personi. Unë jam rritur në një familje ku ka taban, respekt dhe familja është e shenjtë. S’di se si mund ta thërras atë. Kur se njeh një person, s’di ç’të thuash. Nuk di nga të filloj dhe nga ta mbaroj. Por dua ta pyes se ku ishte ky njeri? Ishte gjithmonë në Vorë, unë kam qenë deri në moshën 17 vjeçare në Tiranë. Si di pengesat dhe justifikimet. Unë fëmijën tim, vetëm po te isha poshtë tokës, nuk mund ta takoj dot. S’kam fjalë që të përshkruaj se çfarë kam kaluar unë që në fëmijëri, deri në ditët e sotme. S’kam asnjë lloj ndjesie për atë njeri. Nëse është e mundur ai të lërë një kontakt tek ju. Do doja t’i thoja çdo gjë që kisha përbrenda. Por për momentin nuk jam gati…”, -tha Ermira.

Ndërkohë, babai i saj tha se kishte shumë gjëra për t’i thënë vajzës së tij, ndërsa e thirri disa herë atë live ‘bija ime’. “Ti je bija ime. Ke dy vëllezër në Itali”, pohoi Fadili. Sakaq, Ermira iu kthye babait të saj: “Mua më vjen të qesh, pasi vjen më thua pas 40 vitesh; bija ime”.

Nga martesa tek divorci
70-vjeçari tregon se u martua në vitin 1975 në Tiranë dhe ndërtoi familjen e re në banesën e prindërve të nuses. Nga kjo martese lindi një vajzë të cilës i vunë emrin Ermira. Kur ajo ishte ende foshnje ai dhe e shoqja shkuan në gjykatë për të bërë ndarjen. Vajza iu la nënës, ndërsa ai si baba thotë se nuk kishte të drejtë ta takonte. Arriti ta takonte fshehurazi vetëm pak herë kur ishte shume e vogël, me pas ish-gruaja u rimartua në Durrës dhe aty u shkëputen të gjitha lidhjet mes tyre.
Jeta vazhdoi për të dyja palët, dhe sot Fadili është babai i 2-djemve. Ai u ka rrëfyer te vërteten djemve te tij dhe ata me insistim kane kerkuar te njohin motrën. Pavarësisht tentativave, ata nuk mundën të lidheshin me Ermirën, e cila është e martuar dhe jeton ne Itali se bashku me bashkëshortin dhe 2 femijet. Tashmë babai i saj kërkon veç një takim me Ermirën, për t’i shpjeguar asaj gjithë të vërtetën.
(ed.me/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb