Policia e Amsterdamit me shkopinj gome dhe mburoja u përpoq të shpërndante një turmë prej disa mijërash që ishin mbledhur në kryeqytetin holandez të dielën për të protestuar kundër masave të bllokimit dhe vaksinimeve kundër Covid-19.
Kryebashkiaku i Amsterdamit, Femke Halsema, lëshoi një urdhëresë urgjente, duke fuqizuar policinë të pastrojë Sheshin qendror të Muzeut, pasi protestuesit shkelën një ndalim për mbajtjen e tubimeve publike gjatë valës së fundit të infeksioneve me koronavirus.
Protestuesit, të cilët kryesisht nuk mbanin maska dhe thyen rregullat e distancimit social, gjithashtu injoruan urdhrin për të mos mbajtur një marshim dhe ecën përgjatë një rruge kryesore, duke luajtur muzikë dhe duke mbajtur çadra të verdha në shenjë kundërshtimi ndaj masave të qeverisë .
Holanda hyri në një bllokim të papritur më 19 dhjetor, me qeverinë që urdhëroi mbylljen e të gjitha dyqaneve, përveç atyre thelbësore, si dhe restoranteve, parukierëve, palestrave, muzeve dhe vendeve të tjera publike deri të paktën më 14 janar.
Mbledhjet publike të më shumë se dy personave janë të ndaluara sipas grupit aktual të kufizimeve.
Ashtu si vendet e tjera evropiane , Holanda vendosi masat në përpjekje për të parandaluar një valë të re të variantit Omicron të koronavirusit që mund të mposhtte një sistem tashmë të tendosur të kujdesit shëndetësor.
(BalkanWeb)
