KOSOVE

Një taksisti i njohur i zhdukur prej tre ditësh nga veriu i Mitrovicës, i cili dyshohet se është vrarë është familjar i politikanit të njohur serb i vrarë para më shumë se një viti, Oliver Ivanoviç. Lidhja familjare e taksistit me politikanin serb konfirmohet edhe nga mediat kosovare.

KP ka kontaktuar me lideren e Iniciativës ‘SDP’ në veri, Ksenija Bozhoviç, e cila është shprehur me rezerva lidhur me ngjarjen.

“Jemi të shqetësuar tej mase. Ka qenë njeri i ndershëm dhe i sinqertë, ndërsa ka pasur kontakte të vazhdueshme me Oliverin dhe ardhur shpesh tek ne në seli. Nuk e di arsyen e vërtetë pse ka ndodhur, por kjo është e trishtueshme”, ka thënë Bozhoviç.

Ajo ka apeluar tek organet gjegjëse që ta ndriçoj rastin dhe të gjej sa më parë personin në fjalë. Sipas këtyre burimeve, në automjetin e gjetur nga policia, janë gjetur gjurmë të gjakut dhe një gëzhojë plumbi, që dyshohet se personi i lajmëruar në polici si i zhdukur, është vrarë.

Zëvendës drejtori i policisë së Kosovës për rajonin e veriut, Besim Hoti, ka konfirmuar vetëm se është gjetur automjeti, se policia ka dal menjëherë në vendin e ngjarjes dhe është duke zhvilluar hetimet.

Ai theksoi poashtu se në automjet janë gjetur gjurmë të caktuara që mund të përbëjnë vepër penale, duke mos precizuar për çfarë gjurmësh bëhet fjalë. “Njësitë policore nga dje janë duke siguruar vendin e ngjarjes deri në procedurat e mëtejme të cilat do të zhvillohen gjatë ditës së sotme. Në automjet janë gjetur gjurmë të caktuara të veprës penale, ndërsa rasti në polici evidentohet si person i zhdukur deri në zbardhjen e plotë të ngjarjes”, ka thënë Hoti.

 

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb