Kryeqyteti u trondit mbrëmjen e sotme nga atentati me lëndë plasëse që iu bë në Tiranë, ekzaktësisht në urën e Selitës në zonën e njohur si ish NSHRAK-u, Preng Gjinit nga Rrësheni.
Fotot dhe videot pak pas atentatit kanë mbushur rrjetin, por “BalkanWeb” ka mundur të sigurojë edhe pamjet e para pak pas atentatit ku u hodh në erë mjeti i 51-vjeçarit Preng Gjini, që siç sqaroi policia dyshohet të ketë ndodhur për hakmarrje mes fiseve në Rrëshen.
Kujtojmë që 51-vjeçarit i është vrarë edhe vëllai pak muaj më parë, shtetasi Armando Gjini. Ata janë në hasmëri me familjen Reçi, ndërsa mes të dyjave ka nisur prej vitesh saga e hakmarrjes me zanafillë për pazare droge, bilanci i së cilës numëron deri tani 5 viktima.
Në një video tjetër të siguruar për “BalkanWeb” nga gazetarja Klodiana Lala duket momenti kur autoambulancat mbërrijnë në vendngjarje për të transportuar Preng Gjinin drejt spitalit të Traumës.
(BalkanWeb)