“Është një mrekulli që vajza ime e vogël është ende në jetë. Nesër do e nxjerrin nga njësia e kujdesit intensive. Po jetojmë në një makth”.
Kështu është shprehur për mediat greke, nëna e studentes 21-vjeçare Georgia Kaltsouni, e cila u sulmua me thikë nga ish i dashuri i saj shqiptar në Torino të Italisë, vend ku ndodhej për studime. Sipas mediave, e reja mundi t’i mbijetonte mrekullisht sulmit me thikë që mori në qafë, gjoks dhe zonën e barkut, nga ish i dashuri 27-vjeçar. Raportohet se ngjarja ka ndodhur në një vend parking pranë stacionit të metrosë në Torino. I riu shqiptar, i identifikuar si Jetmir Kurtsmajlaj, është arrestuar nga policia italiane dhe akuzohet për tentativë vrasje.
“Ajo ka marrë pesë thika në gjoks, qafë dhe bark nga një thikë kuzhine. Vajza ime e vogël jeton me një mrekulli. Falë Zotit ajo është mirë tani, ajo i shpëtoi rrezikut sepse organet e saj jetike nuk janë dëmtuar. Ai u përpoq ta godiste në zemër dhe e shtyu fëmijën tim me gjithë forcën që i kishte mbetur në atë moment. Siç mësoj nga vajza ime tjetër e cila po studion gjithashtu atje (Torino), ajo do të qëndrojë edhe një ditë në njësinë e kujdesit intensiv dhe ata do ta nxjerrin nesër. Unë dua të udhëtoj të jem pranë saj, por fatkeqësisht nuk mundem për shkak të koronavirusit. Kushtet nuk më lejojnë të jem në krah të saj. Për fat të mirë, motra e saj është atje dhe unë mësoj gjithçka, po të mos ishte ajo, unë do të isha çmendur nga ankthi im “, është shprehur nëna e të resë për mediat greke.
Ajo ka folur dhe për shqiptarin Kurtsmajlaj. Nëna e Geogria-s ka thënë se dinte vetëm se ata ishin miq.
“Gjithçka që dija për të ishte se ata ishin miq dhe asgjë më shumë. Kështu më tha vajza. Ky njeri më në fund ishte i sëmurë mendor. Nuk mund ta besoj atë që ka ndodhur. Ne jetojmë një makth”, ka thënë gruaja.
Ndër të tjera, gruaja ka mundur të zbardhë versionin e saj të ngjarjes. Sipas nënës së viktimës së sulmit, i riu shqiptar kishte problem me punën dhe pretendonte se e dashura, pra Geogria ishte fajtore për këtë. Pas kësaj ai nisi t’i dërgonte vajzës mesazhe kërcënuese. Gruaja pretendon se e reja ka denoncuar rastin në polici dhe këta të fundit sipas saj e kanë këshilluar të ngre një padi ndaj të riut shqiptar.
“Ai kishte disa probleme me punën e tij. U pushua nga puna dhe i shkoi në mendje se vajza ime ishte fajtore. Pastaj vajza ime mori ndihmë nga një psikolog sepse ai i dërgonte vazhdimisht mesazhe kërcënuese dhe ajo ishte e frikësuar. Psikologu e këshilloi atë të qëndronte larg këtij burri sepse ai ishte i rrezikshëm dhe kishte probleme psikologjike. Vajza ime informoi policinë dhe ata i thanë asaj se mund të ngrinte një padi kundër tij. Fëmija im, për të mos i përshkallëzuar çështjet me të, u përpoq ta qetësonte dhe pas ditësh ata caktuan një takim në një vend publik në mënyrë që njerëzit të kërkonin ndihmë nëse ai e lëndonte atë. Ajo u sulmua të dielën në mbrëmje në një rrugë kryesore në Torino me një thikë kuzhine. Si fëmija im shpëtoi përmes krahëve të tij, unë ende nuk mund ta besoj atë”, ka përfunduar nëna e vajzës.
