Lorenzo Insigne në një intervistë të dhënë nga vendgrumbullimi i Napolit ka folur për shumë tema që kanë lidhje me sezonin e ri. Sulmuesi 27-vjeçar e nisi duke komentuar transferimin e Cristiano Ronaldos te Juventusi, rivali i tyre më i madh në kampionat.

“Ronaldos i uroj mirëseardhjen, por jam shumë kurioz të shikoj se si do të ambientohet me futbollin në Serinë A. Ai nuk mund t’i fitojë ndeshjet i vetëm. Personalisht unë preferoj Messin, por vlerat e portugezit nuk vihen në diskutim. Ekipet italiane kanë mbrojtje të fortë, por ai pikërisht ndaj bardhezinjve në Champions tregoi se është një fenomen, gjithsesi kampionati është i gjatë, të shikojmë. Ndoshta Juventusi do ta aktivizojë portugezin në Champions League, që është edhe objektivi primar i tyre. Gjithsesi mendoj se ne do të jemi ekipi anti Juve”, deklaroi Insigne.

Më pas italiani vlerësoi trajnerin Sarri, që këtë verë u largua për të marrë drejtimin e Chelsea-s. Ndërsa për Anchelotti-n, teknikun e sapoemëruar të Napolit, Insigne u shpreh se është përforcimi më i mirë në merkato.

“Ajo që realizuam falë Maurizios në tre vjet është e jashtëzakonshme. Duhet ta falënderojmë për punën e madhe që ka bërë për të gjithë ne. Ancelotti e vlerëson punën e bërë nga Sarri dhe këtë e kombinon me përvojën e tij. Një gjë më ka çuditur nga Carlo, thjeshtësia e tij në sjellje. Ai kërkon gjithmonë të bisedojë me ne dhe të krijojë lidhje duke synuar të formojë një grup të fortë. Tani me trajnerin e ri të gjithë janë më të qetë, edhe presidenti De Laurentiis. Përforcimi ynë më i mirë është pikërisht Ancelotti”, u shpreh sulmuesi napolitan.

Lidhur me të ardhmen dhe me agjentin e tij, Raiola, i cili u prish gjumin tifozëve napolitanë, Insigne i qetëson duke pohuar se nuk kanë pse të shqetësohen, pasi nuk ka ndërmend të largohet.

“Mund të qëndroni të qetë sepse Raiola i largon lojtarët nga një skuadër, vetëm kur janë ata vetë që e kërkojnë një gjë të tillë. Ai nuk vepron kurrë pa pyetur më parë lojtarin dhe unë nuk kam aspak ndërmend të largohem nga Napoli”, u shpreh Lorenzo Insigne.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb