Ka pasur një përplasje të ashpër në Këshillin e Sigurimit të OKB-së mes Iranit dhe Izraelit, ndërsa fuqitë botërore janë mbledhur për të diskutuar konfliktin ushtarak që po përshkallëzohet.

Ndërsa Sekretari i Përgjithshëm i OKB-së paralajmëroi se bota po vrapon drejt një krize, fuqitë e përhershme evropiane në këshill – Britania e Madhe dhe Franca – bënë thirrje për një de-përshkallëzim urgjent, por shkëmbimi i fortë i fjalëve mes Iranit dhe Izraelit theksoi dallimet e mëdha në qëndrime të tyre.

Ambasadori iranian e quajti sulmin izraelit “të paarsyeshëm”; ai këmbënguli se programi bërthamor i vendit të tij është paqësor dhe – duke akuzuar SHBA-në për bashkëfajësi dhe pjesën tjetër të Këshillit të Sigurimit për dështim në veprim – si dhe tha se Irani do të vazhdojë të mbrohet derisa veprimet ushtarake të Izraelit të ndalojnë.

Ambasadori izraelit, në fjalën e tij pasardhëse, e akuzoi Iranin për një “agjendë gjenocidale”, duke pretenduar se aftësia e tij për të zhvilluar armë bërthamore po afrohet më shpejt se sa mund të imagjinohet dhe, sipas tij, Izraeli nuk do të ndalojë së godituri objektivat bërthamore derisa kërcënimi të jetë “çmontuar”.

Kina tha se Izraeli ka shkelur ligjin ndërkombëtar, ndërsa Rusia deklaroi se shteti izraelit ka treguar një “mospërfillje” ndaj diplomacisë. Por SHBA, duke e quajtur Iranin burimin kryesor të terrorizmit në Lindjen e Mesme, tha se vazhdon të qëndrojë përkrah Izraelit si aleat dhe mbështet veprimet e tij.