TIRANE- Kryeministri i Republikës së Kosovës, Isa Mustafa, në 13 vjetorin e vrasjes, përkujtoi komandantin e shquar të Luftës Clirimtare, udhëheqësin fitimtar të Betejës së Lavdishme të Loxhës, Kolonelin Tahir Zemaj.

Mustafa ka thënë se Kolonel Tahir Zemaj, ishte një luftëtar trim e profesionist, një strateg i mirëfilltë, i cili me përkushtim luftoi pandërprerë për çlirimin e Kosovës.

“Duke përkujtuar angazhimin e madh gjatë tërë luftës çlirimtare, kryeministri Mustafa veçoi rolin vendimtar të Kolonel Tahir Zemajt, në përgatitjen dhe udhëheqjen e Betejës së Loxhës, e cila, falë vizionit prej një strategu kulmor, profesionalizimit e devotshmërisë së Kolonel Zemajt dhe luftëtarëve të tjerë të lirisë, u bë sinonim i fitoreve ushtarake, në betejë të hapur me armikun”, ka thënë Mustafa.

“Është fat i keq që Kolonel Tahir Zemaj u vra në pabesi pas arritjes së lirisë, bashkë me të birin Enisin dhe aktivistin e shquar Hasan Zemaj. Por, si çdo hero, ishte e shkruar që edhe Tahir Zemaj të mos arrinte ta shijonte lirinë, në tërësi.”

Kryeministri ka thënë se lufta dhe kontributi i tij mbeten të pashlyeshme, dhe jo rastësisht ai është dekoruar me Urdhrin “Hero i Kosovës” nga presidenti i Kosovës dhe me Dekoratën “Nderi i Kombit” nga presidenti i Shqipërisë”, thotë kryeministri Mustafa, duke shprehur besimin se drejtësia një ditë do të vihet në vend, duke ndriçuar plotësisht vrasjen e pabesë të Kolonel Tahir Zemajt dhe duke vënë para drejtësisë kryesit e këtij krimi të rëndë. (Klan Kosova)

(ma.ar/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: