TIRANË
Ish-deputetja e PD-së Albana Vokshi deklaron se 12 mijë pedagogë janë ende pa rroga dhe se janë detyruar të marrin borxh për të shlyer faturat e shërbimeve jetike. Për këtë situatë ajo akuzon qeverinë, që sipas saj mendon vetëm për koncesione dhe udhëtime luksi.
Në emër të PD, Vokshi i kërkon qeverisë të kalojë urgjentisht pagat e pedagogëve.
POSTIMI I VOKSHIT
Buxheti i koncesioneve dhe shëtitjet për propagandë lënë ende pa rroga pedagogët.
12 mijë familje pedagogësh presin pagën që ua mban qeveria për allashverishet e saja.
Dita e 10 e muajit janar dhe ende asnjë pedagog nuk ka marrë rrogën, ndërkohë që entourage-i qeveritar ha e pi në restorante të shtrenjta, ku shishja e verës kushton 500 euro.
Paga, e ardhura e vetme në familjen e pedagogëve i ka detyruar shumicën e tyre të marrin borxh për të shlyer faturat e shërbimeve jetike.
Partia Demokratike kërkon që Qeveria të kalojë urgjentisht pagat e pedagogëve e të lehtësojë sadopak fillimin e këtij viti për 12 mijë familje e për dhjetëra mijëra fëmijë.