KOSOVË

Ish-kryetari i Gjykatës Ushtarake të Ushtrisë Çlirimtare të Kosovës, Sokol Dobruna është ftuar nga Gjykata Speciale që të paraqitet në zyrat e saj më datë 12 të këtij muaji.

Ai nuk e di në çfarë roli është ftuar, si dëshmitar apo i dyshuar.

‘Më 12 ma ka caktu terminin kur duhet me u paraqit. Më është paraqitur një person që është prezantuar si slloven dhe punëtor i Prokuririsë së Gjykatës Speciale. Unë supozoj se mund të jem qoftë dëshmitar qoftë i akuzuar, por nuk e di pse duhet me qenë”, tha ai në “Pressing”.

Ai deklaroi se Ushtria Çlirimtare e Kosovës nuk ka kryer asnjë krim në luftë, por shtoi se është i gatshëm të bashkëpunojë me këtë organ pa patur informacione se në cilin rrafsh do pyetet.

“Jo nuk ka kryer krime. Kuptohet se do të bashkëpunoj, por në çfarë rrafshi në çfarë aspekti nuk e di”, tha ai.

(n.m/BalkanWeb)