TIRANE– Një ish-i përndjekur politik në shenjë proteste kundër një vendimi gjyqësor, është lidhur me zinxhirë në kangjellat e institucionit të ATP-së.
Sipas gazetarit Erjon Skëndaj bëhet fjalë për Dush Martinin. Ai ka kundërshtuar një vlerësim që shteti i ka bërë pronës së tij në Lezhë, ku për 52 dynim tokë është dëmshpërblye me 25 milionë lekë të vjetra.
Mësohet se Martini u shoqërua në Komisariatin nr.2 me pranga në duar, pasi pretendohet nga policia se ai bëri rezistencë.
Kjo nuk është hera e parë që ish-i përndjekuri politik proteston për pronën pasi pretendon se ia kanë vjedhur në mënyrë të padrejtë siç bënë në kohën e regjimit komunist.
Kujtojmë se Dush Martini është një personazh i njohur i përfshirë në protestat e ish-të përndjekurve. Më herët në një intervistë në BalkanWeb ai tregonte kalvarin e vuajtjeve, që nga vjedhja e pronës e deri në vitet e tij në burg. Po ashtu ai është një nga pjesëmarrësit në revoltën e Qafë-Barit.
Ai ka bërë 11 vite burg politik për tentativë arratisje dhe prishje të pronës socialiste.
Martini ka denoncuar po ashtu se të gjithë njerëz që kanë marrë pjesë në dënimin e tij në atë kohë, deri vonë kanë qenë drejtues në gjykate.
(ed.me/BalkanWeb)
