Ish-presidenti ukrainas Viktor Yushchenko, ka paralajmëruar se Rusia nuk do ta ndalë politikën e saj ekspansioniste dhe do të vazhdojë të sulmojë vendet e tjera si Bosnje Hercegovina, nëse agresioni rus kundër Ukrainës nuk ndalet tani.

“Nëse Ukraina nuk e ndal Rusinë, tani (BeH) e ka radhën”, tha Yushchenko në një intervistë të botuar sot nga agjencia boshnjake Fena.

Yushchenko ishte president i Ukrainës së pavarur nga viti 2005 deri në vitin 2010, pasi udhëhoqi “Revolucionin e Portokalltë” që çoi në përmbysjen e një regjimi të afërt me Moskën.

Ai u helmua me dioksinë dhe hetimi që u krye konfirmoi indikacionet e përfshirjes së Rusisë në tentativën për vrasje të këtij politikani, i cili mbrojti hapur orientimin politik properëndimor dhe mbështeti qasjen e Ukrainës ndaj anëtarësimit në NATO.

Yushchenko thotë se pretendimet e presidentit rus Vladimir Putin, për arsyet e sulmit ndaj Ukrainës për shkak të kërcënimit të pretenduar ndaj sigurisë së kufijve të Rusisë janë absurde, dhe thekson se gjatë historisë sa herë që Ukraina dëshironte të ishte një vend i pavarur, ajo bëhej shënjestër e synimeve agresive ruse.

Ai i quajti thirrjet për t’i dhënë fund luftës në Ukrainë duke filluar negociatat me Rusinë dhe duke njohur pushtimin e pjesëve të territorit ukrainas krejtësisht të papranueshme, duke thënë se do të ishte njësoj si të negociosh me Hitlerin në atë mënyrë në vitet 1942 ose 1943.

“Paqja mund të arrihet në dy mënyra, ose jeni fitimtar ose kapitulloni. Zgjidhni”, tha ish-presidenti ukrainas.

Ai mbështet fuqimisht ndjekjen penale të atyre që janë përgjegjës për krimet e luftës në Ukrainë.

“Ata që filluan këtë luftë duhet të përfundojnë pas hekurave. Ne nuk duam të tradhtojmë 15 milionë ukrainas që u zhvendosën për shkak të kësaj lufte”, shtoi Yushchenko.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb