Një gjykatë në Honduras dënoi të enjten për herë të dytë ish-zonjën e parë Rosa Elena Bonilla për korrupsion.

Bonilla u dënua me 58 vjet burg në shtator 2019 për përvetësim të më shumë se 1 milion dollarëve gjatë viteve  2010 dhe 2014, kur bashkëshorti i saj Porfirio Lobo ishte president.

Por Gjykata e Lartë e Drejtësisë e rrëzoi dënimin e saj gjashtë muaj më vonë, duke përmendur probleme procedurale dhe duke urdhëruar një gjykim të ri.

Sistemi gjyqësor i Hondurasit tha përmes Twitter të enjten se gjykata e kishte dënuar njëzëri Bonilla për përvetësim dhe mashtrim. Sekretari i saj privat në atë kohë, Saul Escobar u dënua gjithashtu të enjten.

Gjykata urdhëroi burgosjen e tyre në pritje të dënimit, i cili ishte caktuar për të hënën.

“Ata u akuzuan për përvetësim të fondeve publike që ishin caktuar për projekte sociale,” tha Lucía Villars, zëdhënëse e sistemit gjyqësor.

Hetimi që çoi në akuzat kishte nisur me misionin antikorrupsion të Organizatës së Shteteve Amerikane në Honduras.

Sipas prokurorëve, Bonilla mori rreth 480,000 dollarë dhe i depozitoi në llogarinë e saj personale katër ditë përpara se Lobo të largohej nga detyra. Të pandehurit gjithashtu dyshohet se morën 650,000 dollarë nga zyra përmes çeqeve të shkruara në nëntë biznese gjatë viteve 2010 dhe 2014.

Bonilla u arrestua fillimisht në shkurt 2018.