TIRANE – Sipas Partisë Demokratike, “të zgjedhurit e Edi Ramës po përdorin truke sa kriminale dhe qesharake për ti shpëtuar dekriminalizimit”. Në një deklaratë për mediat, sekretari i PD për Zgjedhjet, Ivi Kaso, tha se kryebashkiaku i Kavajës u thotë autoriteteve gjermane, të japin të dhëna për Elvis Ervin Roshin, pasi me këtë emër të sajuar, atij nuk i del asgjë.

“Kemi dëgjuar shumë variante për emrin e kryetarit të Bashkisë së Kavajës, por së fundmi, ai ka nxjerrë një të ri, ku i ka përmbledhur gjithë identitetet në një, duke iu drejtuar autoriteteve gjermane. Në këtë shkresë, i zgjedhuri i Ramës e ka emrin Elvis-Ervin. Mbiemri mbetet po ai, Roshi. Pra Roshi i Ramës, i thotë autoriteteve gjermane, të japin të dhëna për Elvis Ervin Roshin. Sigurisht, me këtë emër të sajuar, atij nuk i del asgjë. Pse kryetari model i Edi Ramës, nuk i drejtohet autoriteteve gjermane me emrin Ervin Roshi që ka pasur deri në vitin 2002, siç e pranon edhe vetë në formularin e vetëdeklarimit, kur dhe është dëbuar nga gjykata. Ndërkohë që ne presim të dhëna të tjera, nga vende të tjera të Europës për Roshin e Ramës, prokuroria duhet të veprojë me shpejtësi në zbatim të ligjit të dekriminalizimit, për të verifikuar fshehjen e të dhënave dhe truket e manipulimet e tjera që ky dhe të tjerë të zgjedhur të Edi Ramës po përdorin për të shmangur ligjin. Dekriminalizimi është i pashmangshëm. Pastrimi i politikës nga krimi dhe të inkriminuarit do të bëhet, me çdo kusht e me çdo mjet.”- deklaroi Ivi Kaso.

REAGON KRYEBASHKIAKU I KAVAJËS: BALTA NUK ME NDAL PËR TË PUNUAR
Pas akuzave të PD-së, kryebashkiaku i Kavajës, Elvis Roshi reagoi në faqen e tij në “Facebook”, duke theksuar se balta që po hidhet ndaj tij nuk e ndal për të punuar. Sipas Roshit, kjo ishte gallata e radhës e SHQUP-istave.

“Përfundimisht gallata s’ka të sosur me Shqup-in dhe Shqup-istat. Sapo doli kllouni i radhës në foltoren e deshtakëve, një pseudo-jurist me emër limonate (Ivi) dhe me akuzoi që i kam bërë truke drejtësisë gjermane sepse i kam kërkuar kartelë penale duke bashkuar emrin Elvis dhe Ervin. Këta personazhe bëjnë opozitë duke më konsideruar më inteligjent se gjithë sistemi i drejtësisë së vendit me të fuqishëm të kontinentit.”- shkruan Roshi.

“Për atë dhe për gjithë Shqup-istat e interesuar, më poshtë keni:
1- deklaratën e limonatës
2- praktikën e letrave në gjuhën shqipe të cilat janë nën emrin tim, Elvis
3- certifikatën time
4- kërkesën ku i kërkoj të ma kthejnë përgjigjen në emrin, Elvis
5- praktikën e letrave në gjuhë gjermane ku kam firmosur dhe kam vulosur nën emrin Elvis
6- vërtetimet e noterit
Ju bej me dije se balta nuk më ndal për të punuar por aman balta nuk është aspak e shëndetshme për mua që marr çdo ditë lajme shpifëse për veten nga mëngjesi deri në darkë.”- shkruan Roshi.

(er.nu/BalkanWeb)