Izraeli njoftoi hapjen e një ambasade në Emiratet e Bashkuara Arabe, katër muaj pas nënshkrimit të një marrëveshjeje për normalizimin e marrëdhënieve me këtë monarki arabe të Gjirit.
“Ambasada e Izraelit në Abu Dhabi u hap zyrtarisht sot me mbërritjen e përfaqësuesit të misionit, Eitan Na’eh”, theksoi ministria izraelite e Punëve të Jashtme në një komunikatë duke shtuar se delegacioni izraelit do të punojë për thellimin e mëtejshëm të lidhjeve mes dy vendeve.
“Ambasada izraelite, e cila aktualisht është e vendosur në “zyra të përkohshme”, do të promovojë “spektrin e plotë” të marrëdhënieve midis dy vendeve”, theksuan autoritetet izraelite.
“Hapja e këtij misioni do të lejojë zhvillimin e plotë dhe të shpejtë të të gjithë potencialit të marrëdhënieve tona”, përshëndeti në një deklaratë shefi i diplomacisë izraelite, Gabi Ashkenazi.
Izraeli ka njoftuar këto muajt e fundit marrëveshje për normalizimin e marrëdhënieve me katër vende arabe si Emiratet e Bashkuara Arabe, Bahreini por gjithashtu Sudani dhe MAroku, nën drejtimin e SHBA-së.//ATSH