Ushtria e Izraelit pranoi zyrtarisht se ka shkatërruar një reaktor të dyshuar bërthamor në Siri, në vitin 2007.

Ajo tha se sulmi në rajonin Deir-al-Zour ka zhdukur “kërcënimin për ekzistencën e Izraelit dhe të të gjithë rajonit”.

Sipas ushtrisë izraelite, reaktori ka qenë afër përfundimit. Për kohë të gjatë është menduar se Izraeli ka qenë përgjegjës, por ai kurrë nuk e ka pranuar deri më tash. Siria vazhdimisht e ka mohuar se lokacioni i bombarduar ka qenë reaktor bërthamor, shkruan rel.

Vendimi i Izraelit për ta bërë publik dhe për ta justifikuar sulmin e një dekade më parë kundër Sirisë vjen pas thirrjeve të vazhdueshme të kryeministrit izraelit, Benjamin Netanyahu, për SHBA-në dhe komunitetin ndërkombëtar që të ndërmarrin veprime më të fuqishme kundër Iranit, i cili është aleati më i afërt i presidentit sirian, Bashar al-Assad.

Netanyahu ka paralajmëruar disa herë se Izraeli nuk do ta lejojë Iranin të zhvillojë armë bërthamore dhe as të ndërtojë fabrika të raketave në Siri që mund të kërcënojnë Izraelin.

(m.k/BalkanWeb)