Personazhi i Leonardo DiCaprios në Titanic nuk mund t’i mbijetonte skenës së famshme të “derës lundruese” me Kate Winslet, ka theksuar regjisori James Cameron – një çerek shekulli pas debutimit të filmit të tij të suksesshëm.
Kanadezi pretendon se ka vërtetuar shkencërisht se vdekja e personazhit të DiCaprios, Jack, ishte e pashmangshme, duke zgjidhur një pyetje që ka preokupuar prej kohësh fansat e romancës katastrofë të vitit 1997.
Në fund të filmit, personazhi i Winslet, Rose, mbijeton duke u shtrirë në një derë lundruese ndërsa Jack ngrin për vdekje në ujë.
Cameron, në një intervistë për gazetën Toronto Sun, tha: “Ne kemi bërë që atëherë një analizë të plotë mjeko-ligjore me një ekspert të hipotermisë që riprodhoi trapin nga filmi.
“Ne morëm dy persona që kishin të njëjtën masë trupore si Kate dhe Leo dhe vendosëm sensorë mbi to dhe brenda tyre dhe i vendosëm në ujë me akull dhe testuam për të parë nëse ata mund të kishin mbijetuar përmes një sërë metodash. Dhe përgjigja ishte se nuk kishte asnjë mënyrë që ata të dy të kishin mbijetuar. Vetëm një mund të mbijetonte.”
Cameron, 68 vjeç, shtoi: “Ndoshta – ndoshta – pas 25 vitesh, nuk do të më duhet të merrem më me këtë”.
Rezultatet e studimit të tij do të shfaqen në kanalin National Geographic kur Titanic të rikthehet në shkurt. Sipas Cameron, Jack “duhej të vdiste” për qëllime narrative. “Është si Romeo dhe Zhuljeta”, tha ai. “Është një film për dashurinë, sakrificën dhe vdekshmërinë. Dashuria matet me sakrificën”.
Në vitin 2012, emisioni televiziv MythBusters u përpoq të zgjidhte atë që është përshkruar si “polemika më e madhe e filmit ndonjëherë”, duke përfunduar: “Vdekja e Xhekut ishte e panevojshme”.
Cameron e ka hedhur poshtë më parë këtë teori si “plot mut”, ndërsa DiCaprio gjithmonë ka refuzuar t’u përgjigjet pyetjeve në lidhje me skenën. Miku i tij dhe shoku i tij aktor Brad Pitt ka folur publikisht me DiCaprion për skenën, duke deklaruar në një fjalim për çmimet: “Unë do ta kisha ndarë trapin”.
“Titanic” ishte filmi me fitimin më të madh të të gjitha kohërave derisa u tejkalua nga filmi epik i Cameron-it, i mbushur me efekte, “Avatar” i vitit 2009.
