Nga: VJOLLCA KONGJONI*

TIRANË- Shtohet lista e bizneseve debitore ndaj Tatimeve, të cilat po shkojnë drejt falimentit. Vetëm për periudhën janar-mars të këtij viti numri i tyre arriti në 16005 apo mbi 1000 biznese më shumë se fundi i vitit të kaluar.

Duke mos paguar taksat dhe tatimet këto subjekte përfshihen në listën e zesë së Drejtorisë së Përgjthshme të Tatimeve. Ndaj këtyre bizneseve Administrata tatimore ka vendosur që sipas ligjit “Për procedurat tatimore” të marrë masat e sigurimit mbi të gjitha pasuritë për ekzekutimin e detyrimeve duke nisur mbledhjen me forcë të tyre. Ligji përcakton që këtyre subjekteve t’u kërkohen llogaritë bankare, automjetet apo pronat e patundshme deri në shlyerjen e plotë të borxhit. Në rast të kundërt për bizneset që nuk paguajnë, pasuritë e tyre do të dalin në shitje.

Shumica e bizneseve që listohen si debitorë ndaj tatimeve për tremujorin e parë të vitit 2016, ushtrojnë aktivitetin në Tiranë, Durrës, Fier, Gjirokastër dhe Vlorë. Deri në fund të dhjetorit të vitit të kaluar totali i bizneseve që nuk kishin paguar tatimet dhe taksat në afat arriti në 15 mijë. Bizneset e përfshira në këtë listë gjatë vitit të shkuar zunë 26 për qind të totalit, kjo shifër flet për një situatë jo positive të subjekteve tatimore në vend. Ajo që bie në sy në listën e publikuar nga administrata tatimore të subjekteve me barre siguruese dhe hipotekore është shtimi i numrit të tyre gjatë dy viteve të fundit me mbi 10 mijë biznese. Por nëse Tatimet kanë publikuar numrin dhe emrat e këtyre subjekteve nuk ka asnjë shifër se sa është në fakt vlera e borxhit tatimor.
(ma.ar/BalkanWeb)