TIRANË
Avokati i grupit “Bajri”, Arbër Hoxhaj, ka folur për mediat pasi Gjykata e Krimeve të Rënda ka dhënë masën e sigurisë për të mbrojturit e tij. Ai tha se pretendimet e ngritura për akuza të reja ndaj klientëve të tij nuk janë gjë tjetër, por ngjajnë më tepër me një flluskë sapuni. Më tej avokati ka treguar edhe reagimin e klientëve të tij, të cilët mësohet se vendimin e gjykatës e kanë cilësuar si të padrejtë.
“Mund të themi me bindje se kjo është një flluskë sapuni dhe prokuroria e di se është flluskë sapuni, që do plasë në momentin e parë që cështja do gjykohet në themel. Nuk janë akuza të reja. Ta akuzuarit pretenduan paligjshmërinë e këtij vendimi. Në dijeni tonë, për të hetuarit Behar, Safet, dhe Ilir Bajri, Asmer Bilali dhe Safet Rustemi u la në fuqi masa e sigurisë arrest me burg. Në radhë të parë nuk kemi të bëjmë me akuza të reja, por me dyshime”-tha Hoxhaj.
Gjykata ka shqiptuar masat e mëposhtme për personat e arrestuar, të cilët dyshohen si pjesë e grupit të strukturuar kriminal “Bajri”.
Masa e sigurisë “Arrest në burg”
1-Behar Brajoviq (Bajri)
2-Safet Rustemi
3-Ilir Rustemi
4-Asmer Bilali
5-Ismet Idrizi
6-Sirjan Alija
Masa e sigurisë “Arrest në shtëpi”
7-Jorida Murati
Masa e sigurisë “Detyrim paraqitje”
8-Senad Halluni
9-Florine Hoxha
10-Mira Nikaj (Përgjegjëse e financës në Spital).
Grupi i strukturuar kriminal “Bajri” akuzohet për punësime fiktive në një sërë institucionesh të vendit, përfshirë edhe Spitalin Rajonal të Shkodrës.