Pasi dje u vu në qendër të vëmendjes nga mediat pas një gafe që bëri gjatë një prononcimi mbi situatën e krijuar nga tërmeti, kryetarja e Bashkisë së Durrësit Valbona Sako ka dhënë sot dorëheqjen nga detyra. Ka qenë vet Sako ajo që ka bërë të ditur vendimin e saj përmes një postimi në ‘Facebook’. Në reagimin e saj Sako shprehet e lënduar nga reagimet negative pas komentit të saj, ndërsa ka falenderuar të gjithë ata që e përkrahën.
“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. Falenderoj nga zemra të gjithë ata që më besuan dhe shpresoj në mirëkuptimin e të gjithëv”, shkruan ajo ne Fb.
Në një intervistë të dhënë dje për “Top Channel” Valbona Sako mes tjerash tha se: “Për hir të së vërtetës duhet ta themi që ky ishte një tërmet i nivelit shkatërrimtar, por që jemi të kënaqur me 50 viktima, sepse në rastet e tjera kanë qenë mbi 1000 viktima”.
Gafa e kryebashkiakes shkaktoi reagime të shumta si në radhët e politikës, por edhe nga qytetarët. Kujtojmë se nga tërmeti i 26 nëntorit, qyteti i Durrësit ishte ndër më të dëmtuarit, ndërkohë që në total numri i personave që humbën jetën është 52, ndërsa mbi 700 të tjerë u plagosën. Ende nuk dihet se cili do të jetë kryetari i ri i bashkisë, pas këtyre momenteve të vështira që po kalon Durrësi.
(BalkanWeb)
