Juventus e ka nisur mirë fazën përgatitore në Shtetet e Bashkuara të Amerikës, teksa jo vetëm ka fituar ndeshjen e parë miqësore, por edhe blerjet e reja janë përshtatur mirë. Bardhezinjtë mposhtën 2-0 meksikanët në testin e parë.
Për “Zonjën e Vjetër” shënuan Da Graca në minutën e 10′, falë një goditje këndi të krosuar nga blerja e merkatos së verës, Angel Di Maria dhe në minutën e 80′ me Kompanjo, i cili pas një kundërsulmi, dribloi mbrojtësin e meksikanëve në zonë dhe goditi mjaft bukur duke e dërguar topin në fundin e rrjetës.
Në këtë takim kanë pasur impakt të mirë edhe dy blerjet e bujshme në këtë sesion të merkatos verore, Pol Pogba dhe Angel Di Maria. Bardhezinjtë e Masimiliano Alegrit do të zhvillojnë edhe dy miqësore të tjera në prag të startit të sezonit të ri futbollistik, ku do të përballen më 27 korrik ndaj Barcelonës dhe ndaj Realit të Madridit më 31 korrik.
Dy teste që do të masin forcën reale të Juventusit për sezonin e ri, që kërkon të rikthehet te titulli kampion pas dy sezoneve.
(BalkanWeb)
