Ai që duhet të ishte transferimi i madh në merkaton e verës është kthyer në një “boomerang” për Juventus. “Zonja e Vjetër” dështoi në misionin për të marrë shërbimet e Luis Suarez, ndërsa tani duhet të përballet me akuza të rënda që pritet të shkojnë deri në “ndjekje penale” për disa nga drejtuesit e saj.

Gjithçka lidhet me provimin e gjuhës italiane të sulmuesit, që do t’i hapte rrugën dhënies së nënshtetësisë italiane dhe më pas transferimit te Juventus. Guardia Di Finanza ka zbuluar se teza e provimit i ishte dhënë përpara kohe Luis Suarez nga drejtuesit e Universitetit të Perugia, ndërsa bashkë me drejtuesit Juventinë ishte vendosur edhe nota që do të merrte futbollisti.

Gjithçka ishte akorduar, pas insistimit të drejtuesëve më të lartë të Juventusit, ashtu siç lexohet në hetimet e Guardia Di Finanza. Ky “skandal” i ka kushtuar vendin e punës krerëve të Universitetit dhe profesorëve të pranishëm në provimin e Suarez. Ndërkohë, sipas mediave italiane nën hetim janë vendosur edhe disa drejtues të klubit Juventin.
(balkanweb)