SHKODËR

Kontrolle intensive në pikat e kontrollit të kalimit kufitar, me qëllim parandalimin, evidentimin dhe goditjen e paligjshmërisë. Procedohen penalisht 3 shtetas 1 prej tyre Doganier në PKK Han i Hotit

Në vijim të punës dhe goditjeve të njëpasnjëshme për parandalimin, evidentimin dhe goditjen e veprimtarisë kriminale në fushën e kontrabandës me mallra, bazuar dhe në informacionet e marra në rrugë operative, nga Specialistët e Seksionit të Hetimit të Krimit Ekonomiko Financiar në bashkëpunim me Drejtorinë e Hetimit Doganor në PKK Han i Hotit filloi procedimi penal për shtetasit:

Ruzhdi Shabaj, 59 vjeç, I. Rr., 48 vjeç, Denad Mesi, 28 vjeç, banues në Shkodër.

Shtetasi Ruzhdi Shabaj është konstatuar në PKK Han i Hotit me disa mallra dhe produkte të cilat i ka kaluar pa deklaruar në organet doganore gjithashtu në vijim të veprimeve hetimore gjatë kontrollit të banesës së këtij shtetasi iu gjet një armë gjahu pa lejen përkatëse.

Në vijim është ushtruar kontroll në njërin prej subjekteve të cilit dyshohet se shtetasi Ruzhdi Shabaj e furnizonte me produkte kontrabandë, me administrator shtetasin I. Rr., nga kontrolli i ushtruar në këtë aktivitet tregtar, janë konstatuar disa mallra apo produkte me mbishkrime malazeze dhe dyshohet se janë mallra kontrabandë me qëllim tregtimin e tyre.

Duke parë lëvizjet e shpeshta hyrje- daljet në drejtim të shtetit Malazez të shtetasit Ruzhdi Shabaj, i cili konsiderohej si person me risk dhe dyshohej se merret me kalimin e produkteve kontrabandë, u procedua penalisht shtetasi Denad Mesi, me profesion doganier pasi dyshohet se në bashkëpunim dhe me doganier të tjerë kanë favorizuar shtetasin Ruzhdi Shabaj në kohë të ndryshme për kryerjen e këtij aktiviteti të kundraligjshëm.

U sekustruan në cilësinë e provës materiale, 1 armë gjahu dhe disa mallra ushqimorë kontrabandë.

Grupi Hetimor në bashkëpunim me Prokurorinë e Rrethit Gjyqësor Shkodër po punon për identifikimin e personave të tjerë të përfshirë në këtë aktivitet të kundraligjshëm.

Materialet procedurale iu referuan Prokurorisë Shkodër, në ngarkim të shtetasve të lartpërmendur për veprat penale “Kontrabandë me mallra të tjera”, “Prodhimi dhe mbajtja pa leje e armëve të gjuetisë dhe sportive” “Tregtimi dhe transportimi i mallrave që janë kontrabandë“, “Fshehja e të ardhurave“ dhe “Shpërdorim detyre”

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb