TIRANË- Zëvendësdrejtori i Policisë së Shtetit, Altin Qato ka folur sot në studion e “Opinion” në News24 për situatën e kultivimit dhe asgjësimit të kanabisit në vend, duke iu referuar edhe raportit të fundit të Guardia di Finanza që u bë publik gjatë ditës së sotme.

Për sa i përket numri të vogël të autorëve të këtij aktiviteti të paligjshëm, Qato tha se hetimet vazhdojnë dhe shumë grupe kriminale janë goditur edhe në bashkëpunim me policitë e vendeve të tjera të Evropës.

Në intervistën e sjellë nga BalkanWeb, Qato sqaroi se nuk ka rritje të sasisë së kanabisit por se fara vietnameze e përdorur këtë vit në 70% të rasteve ka një prodhim më të vogël por cikël të shkurtër dhe kultivuesit kanë mbjellë që të arrijnë sasinë e mëparshme.

“Është e pamundur t’i kapësh të gjithë autorët në flagrancë por hetimet vazhdojnë. Veprimet procedurale vazhdojnë, për gjetjen e pronarit të tokës etj. Krahasohen provat në vendngjarje dhe gjatë hetimeve numri i autorëve shtohet.

Ka pasur akuza se asnjëherë nuk kapen autorët, apo përgjegjësit për financimin. Keni një strategji?
Abuzohet me këtë shpjegim. Hetimi e nxjerr nëse ka investues apo trafikantë. Për çdo person që konstatojmë se merret me kultivimin, ka një vepër penale që është kultivimi i bimëve narkotike. Normalisht që kjo bimë nuk kultivohet për tregun shqiptar sepse tregu është shumë i vogël dhe normalisht që trafikohet. Policia shqiptare ka patur një numër të madh rastesh kur janë kapur trafikantët. Operacione të përbashkëta me policitë e vendeve të tjera. Janë bërë goditje të grupeve të mirëfillta kriminale. Ne sot shpjegojmë kultivimin e lëndëve narkotike.

Për sa i përket buxhetit…
Është një buxhet i theksuar për të goditur kultivimin dhe trafikun. Ka nevojë për një numër të konsiderueshëm efektivesh, numër mjetesh ndaj ka edhe një buxhet të madh.
Ne e kemi buxhetin të mjaftueshëm por e përmendim për të thënë se ka një kosto të jashtëzakonshme për policinë.

Si e komentoni shkrimin e Huffington Post?
Janë komente mediatike. Shumë herë nga mediat abuzohet me ca përfitime marramendëse që jepen për përfitimet që janë në pjesën fundore të trafikut jo të kultivimit. Për ne, nuk besoj se është e vërtetë. Nuk kemi një informacion të tillë. Nuk ka struktura të policisë në këtë aktivitet kriminal. Nuk ka grupe të mirëfillta që merren me këtë aktivitet.

Si është situata me kanabisin në të vërtetë? Nga PD ka akuza e akuza për vendin që e ka mbuluar kanabisi…
Ne si polici nuk e kemi fshehur që ka kultivim të bimëve narkotike. Madje është e kundërta, ne e kemi shfaqur që ka kultivim. Ne kemi bërë analizat tona. Realisht ka vepra penale më shumë se vitin e kaluar. Ka bimë të asgjësuara më shumë se vitin e kaluar. Nuk është shtuar sipërfaqja por goditjet e policisë. Kemi analizën tonë të riskut dhe dimë ku janë zonat më të përshtatshme për të kultivuar kanabisin. Këto elementë krijojnë perceptimin që ka një shtim. 20% e bimëve janë në gjendje fidan. Ne kemi rritur kontrollin e territorit, si nga ajri dhe nga toka.

Cilat janë zonat më problematike?
Janë zonat malore sepse është mundësia më e madhe për t’u fshehur dhe më e vështirë për të vajtur forcat policore. Sivjet është përdorur një farë, fara vietnameze. Është 70% e totalit, pro është edhe një raport se kjo prodhon më pak se një bimë normale. Ka një cikël më të shpejtë. Është mbjellë më shumë për të kapur sasinë por jo se është shtuar sasia.

Ditë pas dite asgjësohen parcela kanabisi?
Aktivitet kriminal ka patur, edhe do ketë. Por ne si polici kemi rritur masat. Por është e vërtetë që siguria në territor është rritur. Ka ende për të bërë. Ne nuk kënaqemi asnjëherë, pasi ende vijojmë të jemi të angazhuar. Padyshim bazohemi tek të dhënat dhe bëjmë krahasime. Këto shifra na bëjnë optimistë, por kur bëjmë analizat kuptojmë se jemi më mirë se vitet e kaluara.

Çfarë strategjie do të ndiqet në vijim?
Policia bën një program çdo vit. Ka një strategji për të goditur trafikimin. Bimët që i kanë shpëtuar aksionit të policisë padyshim që magazinohen. Dhe policia do të vijojë kontrollet e territorit të vendit. Kontrolle do të ketë edhe në pikat kufitare.

Cila është situata me rendin, jo vetën në Tiranë, por edhe në mbarë vendin?
Është rreth gati 20 % e totalit të veprave penale që është ulur në raport me vitin e kaluar. Ka të bëjë me vjedhjet, shkatërrimin e pronës, krimin. Ka patur ngjarje të rënda. Ka ngjarje me motive të ndryshme, të ndodhura për konflikte të çastit, që janë të vështira për t’u dokumentuar, pasi kanë ndodhur aty për aty. Por policia është angazhuar maksimalisht për kapjen e autorëve.

NOKA: KUPOLA E POLICISË E PËRFSHIRË NË MBJELLJE DHE TRAFIK TË DROGËS
Nga ana tjetër, deputeti demokrat, Flamur Noka tha se e vetmja zgjidhje për situatën në vend është shpallja e gjendjes së jashtëzakonshme. Në një lidhje telefonike për Neës24, ai tha se Guardia di Finanza ka monitoruar vetëm 17% të territorit dhe ka rezultuar se ka 5-fishim të sipërfaqes duke shtruar pyetjen se nëse do kishte monitoruar të gjithë vendin sa do ishte kjo siëprfaqe?

“Vetëm 17 % ishte e monitoruar nga Guardia di Finanza. 5-fishimi i sipërfaqes është shifër e frikshme. Ajo që ne kemi paralajmëruar që në Shqipëri është 5-fishuar u konfirmua nga GDF. Ajo konfirmon se edhe fara e re, vietnameze e hyrë në dogana, është mbjellë 2-3 herë, ka pasur 2-3 kultivime. Është një alarm i madh për shoqërinë shqiptare. Karteli po shkatërron gjithçka”, tha Noka.

Ju keni qenë i pari që keni denoncuar situatë me kanabisin vietnamez, si ka mbërritur?

Holanda konfirmon, mediat holandeze, zyrtarët holandezë se 2 milionë fara të kanabisit janë blerë në Holandë dhe kanë ardhur në Shqipëri. Ne e bëmë publike dhe e denoncuam. Mirëpo kryeministri, ministri i brendshëm, siç e kanë bërë në modë, mohuan në mënyrë kategorike duke bërë edhe ironi se mos është japoneze.

Fara vietnameze por edhe fara e vendit ka dominuar dhe ka mbushur vendin.
GDF ka monitoruar vetëm 17% dhe deklaron se ka 5-fishim po të kishte monitoruar gjithë vendin?

A do ishte zgjidhje përdorimi i forcave ushtarake në kushtet e krijuara?
Është vetëm një gjendje e jashtëzakonshme që mund të japë zgjidhje për situatën. Drejtorët e qarqeve janë ata që drejtojnë këtë biznes kriminal në Shqipëri.

Unë po ju them situata që është në Shqipëri në lidhje me territorin e mbuluar me kanabis është për të shpallur gjendje të jashtëzakonshme. Kupola e policisë e përfshirë në mbjellje dhe trafik të drogës. Përveç fitimeve marramendëse luhet edhe loja për të blerë votën, siç ndodhi në Dibër.

(m.k/el.sp/BalkanWeb)