Kancelari gjerman Olaf Scholz tha se Rusia po përballet me një periudhë të pasigurt për shkak të luftës që filloi kundër Ukrainës.

Scholz foli në një konferencë për media pas Samitit të Liderëve të G7, të organizuar nga Gjermania në Pallatin Elmau në Bavari.

“Ky samit tregoi unitetin dhe vendosmërinë tonë kundër agresionit rus”, tha Scholz.

Duke thënë se Rusia ka 125 ditë që lufton kundër Ukrainës, Scholz theksoi se ata, ashtu si G7, e dënojnë atë luftë.

“Asgjë nuk është si më parë. Të gjithë e dimë që nuk ka kthim në periudhën e paraluftës dhe nuk mund të ketë. Është e qartë se të gjithë kemi një periudhë pasigurie përpara nesh. Është sfiduese dhe për këtë arsye vendosmëria dhe bashkimi janë të rëndësishme”, tha Scholz.

Ai nënvizoi se do të vazhdojë të mbështesë Ukrainën.

“Jemi dakord që presidenti rus Vladimir Putin nuk duhet të fitojë këtë luftë. Ne do të vazhdojmë të mbajmë dhe të rrisim kostot ekonomike dhe politike për Putinin dhe regjimin e tij në këtë luftë”, tha Scholz.

Duke theksuar se ai e sheh një marrëveshje të drejtë për përfundimin e luftës midis Rusisë dhe Ukrainës si parakusht për heqjen e sanksioneve ndërkombëtare, Scholz tha:

“Fatkeqësisht, në këtë pikë po shohim se Rusia po vazhdon brutalisht luftën. Duhet të dihet se sanksionet do të vazhdojnë dhe nuk do të hiqen pa një marrëveshje të drejtë me Ukrainën. Nuk ka gjë të tillë si një paqe e diktuar”, tha kancelari gjerman.

Ai shtoi se gjithsej 29 miliardë dollarë ndihmë buxhetore dhe 2.9 miliardë dollarë ndihmë humanitare do t’i jepen Ukrainës.