Kreu i Partisë Demokratike, Lulzim Basha, ka thënë nga foltorja e Kuvendit, se nuk ka asnjë arsye se përse kryeministri Edi Rama të mos votojë vettingun në politikë.

Kjo sipas Bashës është përshëndetur nga Komisioni i Venecias dhe se metodologjia është ajo e ndjekur me gjyqtarët dhe prokurorët.

“Ky(Rama) ka takuar më shumë sheikë dhe investitorë strategjikë se sa qytetarë këto muajt e fundit. Ai ka frikë se më dhemb dhëmbi, nuk më dhemb dhëmbi mua, i kam të mitë, i kam të shëndetshme. Mos qaj hallin e dhëmbëve të mi, se një herë që të kafshuan për tre javë u zhduke fare, asnjë s’e dinte se ku shkove. Meqë këto nuk i kemi për fjalë, por për vepra. Pse i trembesh vettingut në politikë? Sepse Venecia është shprehur për këtë. Filloje këtë gjë nga unë, nga të duash filloje. Nga pasuria ime, e familjarëve të mi, të afërmve të mi, të të gjithë atyre që kanë lidhje me mua. Propozimi i vettingut në politikë është miratuar nga Komisioni i Venecias. Kujt i ndruhesh. Mere, ja ku e ke, kaloje. E ke përpara, vetting në politikë, nga i pari te i fundit. Metodologjinë e kemi miratuar, për gjyqtarët dhe prokurorët. Them ta bëj SPAK-u, ku e ke frikën? Pse të fle lepuri në bark. Ti je pengesë për Reformën në Drejtësi, ti do ta zgjasësh vettingun, për të kompromentuar gjyqtarët dhe prokurorët.

Ti, që brenda ditës bredh nga Jugu në Veri dhe flet sikur je mbi gomar. Njerëzit rrinë në çadra thua ti pse i pëlqen të rrinë dhe të marrin bonusin. Ndërkohë që me propozimin që keni sjellë, që do të diskutohet kur të mbarosh justifikimet verbale, me këto që keni sjellë këtu, prapë se prapë keni propozuar t’u merrni para shqiptarëve për 7 kontrata me vlerë 2 mld dollarë. PPP, klientëve tuja dhe nga ana tjetër thoni s’kemi ku të gjejmë paratë për të zbritur TVSH e ushqimeve me një kosto prej 150 mln euro, për të ulur çmimin e bukës, vajin, sheqerin, e atyre familjeve që ti viziton çdo ditë. Këto nuk i sheh, por ke sjellë 7 kontrata me vlerë 2 mld euro. Ky je ti, tjetra është fasadë. Ky është plani yt. Natyrisht, të vjedhësh shqiptarët, pasuritë e tyre, e më pas të vjedhësh votën nuk është virtyt, as ves, por krim. Por duke qenë se drejtësia e reformuar, çdo dhemb i vogël që del ia thyen ti me çekiç. Ne për detyrim ndaj qytetarëve, zoti na ruajt, jo mua, por më të riun e më të renë në grupin tonë parlamentar, që të na shkojë mendja të bëjmë krashillëk me ty, sepse na duhen 10 jetë për të kapur në maratonën e borxheve që i keni hyrë qytetarëve. Të jesh i sigurt që vettingun e politikanëve e do çdo shqiptarë. Ti the do të zgjatet kjo dhe pikë për reformën, por kur flas për vettingun tënd ti thua do të diskutojmë dhe zgjasin, sepse ti ke frikë. Frika nga korruspioni është më e keqja, sepse ajo shtyn që të bësh gjëma të mëdha, asgjësimin e ndryshimit.

Këto janë konstatimet e OHDIR-it që ta kanë vendosur ty vulën si Lukashenko i Ballkanit. Të kanë mbetur shumë pak argumente, por kërkon dëshpërimisht aleatë. Brenda shtëpisë tënde të ka mbetur një grusht, te oligarkët edhe më pak, te ato që të dalin zot me kobure në xhep dhe lekët e drogës, të jesh i sigurt i ka filluar t’i rrëshqasë toka nën këmbë. Përpjekja për të ndërtuar një aleancë të pa shenjtë me trekëndëshin e Bermudës do të dështojë. Ti ke vetëm një rrugë, që ke 8 vite që e mban vendin peng për egon tënde të sëmurë, të kërkosh ndjesë për ekonominë e rrënuar, për asgjësimin e zgjedhjeve të lira e të ndershme, të heqësh duart nga fyti i SPAK, të votosh venttingun politik dhe të lejosh që PS, e marrë peng në bodrumet e oligarkisë dhe krimit, të ketë guximin të konkurrojë ndershëm me PD, me një përplasje idesh, vizionesh”, tha Basha.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb