Gjykata e Lartë në Kenia nuk ka marrë parasysh kërkesën e një sërë aktivistëve, të cilët kanë kërkuar që të ndryshohet ligji dhe kryerja e marrëdhënieve intime mes personave të së njëjtit seks të mos cilësohet krim.
Tre anëtarët e trupit gjykues refuzuan pretendimet e aktivistëve se ligji i kohës koloniale bie në kundërshtim me kushtetutën e re, me të cilën garantohen të drejtat e barazisë, dinjitetit dhe privatësisë. Kodi Penal i Kenias e kriminalizon kryerjen e nevojave dhe dëshirave fizike që janë në kundërshtim me rregullin e natyrës.
Në Kenia, marrëdhëniet seksuale mes seksit të njëjtë dënohen deri 14 vjet burgim. Komisioni Kombëtar i Kenias për të Drejtat e Homoseksualëve ka bërë thirrje që ligji të largohet nga sistemi i drejtësisë, duke thënë se ai e ka rritur nivelin e homofobisë. BBC shkruan se shumë shtete afrikane kanë në fuqi ligjin për dënim të homoseksualëve.