Presidenti kilian Sebastian Pinera shpalli të mërkurën një gjendje të jashtëzakonshme në katër provinca veriore, duke i dhënë fuqi të posaçme Forcave të Armatosura për të kontrolluar migrimin e parregullt përgjatë kufirit.

Masa, e cila do të zgjasë 15 ditë me mundësinë e një rinovimi dy-javor, përfshin vendosjen e 672 forca të personelit ushtarak dhe 100 oficerë policie për të ruajtur kufirin verior të Kilit me Bolivinë dhe Perunë.

Vendi i Amerikës së Jugut po përballet me një “krizë migratore dhe sigurie”, kryesisht në provincat e Arica, Parinacota, Tamarugal dhe El Loa, sipas qeverisë, mes një rritje të fluksit të emigrantëve përmes kalimeve të paautorizuara dhe në kushte ekstreme.

Presidenti shpjegoi në një deklaratë për shtyp se policia dhe ushtria do të kryejnë patrullime dhe kontrolle, do të krijojnë poste të reja vëzhgimi, do të vendosin dronë dhe avionë pa pilot, do të përdorin helikopterët për vëzhgim dhe transferim, së bashku me kamerat e shikimit të natës, kamerat termike dhe pajisjet e komunikimit satelitor.

Aktualisht, dhjetëra persona janë të bllokuar në qytetet kufitare në pritje të një zgjidhjeje zyrtare, pasi kanë hyrë në vend përmes kalimeve të paautorizuara.

Kili së fundmi prezantoi një ligj migracioni që synon të “rregullojë fluksin migrator” në vend, sipas Pinera, i cili deklaroi se ka qenë në bisedime me vendet fqinje të Argjentinës, Bolivisë dhe Perusë për të zgjidhur situatën.

Rregullorja e re do të kthejë menjëherë në kufi personat që hyjnë në vend në mënyrë të parregullt, pa një gjykim paraprak.