Pas sanksioneve amerikane kundër armatimeve ruse, Kina shprehu indinjatën e rej. Uashingtoni njoftoi dje në mbrëmje se kishte sanksionuar për herë të parë një entitet të huaj për blerjen e armëve ruse, më saktë bëhet fjalë për një njësi të ushtrisë kineze, që ka blerë avionë luftarakë dhe raketa tokë-ajër.
Sipas Kinës zyrtare, ky gjest i SHBA-së shkel rëndë parimet themelore të marrëdhënieve ndërkombëtare.
“Ky gjest i SHBA-së shkel rëndë parimet themelore të marrëdhënieve ndërkombëtare dhe dëmton seriozisht marrëdhëniet mes dy vendeve dhe ushtrive të tyre”, deklaroi gjatë një konference për shtyp zëdhënësi i diplomacisë kineze, Geng Shuang duke theksuar se Pekini kishte paraqitur menjëherë protestat e tij në Uashington.
“Ne i bëjmë thirrje fuqishëm SHBA-së të korrigjojë menjëherë këtë gabim dhe të tërheqë të ashtuquajturat sanksione. Përndryshe SHBA-ja duhet të paguajë pasojat”, paralajmëroi ai.
(BalkanWeb)
