Kina ka deklaruar se është “gjithmonë kundër përdorimit të sanksioneve për të zgjidhur problemet”, sepse ato “dëmtojnë jetesën e njerëzve në të gjitha vendet” në shenjën e fundit të zhgënjimit në rritje për pasojat e luftës së Putinit në Ukrainë. Ministri i Jashtëm Wang Yi, duke folur gjatë një telefonate me homologun e tij spanjoll Jose Manuel Albares të martën, tha se Kina “nuk duhet të preket” nga sanksionet e Perëndimit, sepse vendi “nuk është palë në krizë”.

Kina e ka “kundërshtuar gjithmonë përdorimin e sanksioneve për të zgjidhur problemet, e lëre më sanksionet e njëanshme që nuk kanë bazë në të drejtën ndërkombëtare, të cilat do të dëmtojnë jetesën e njerëzve në të gjitha vendet”, tha Wang.

Pothuajse tre javë pasi trupat ruse marshuan në Ukrainë, forcat e Moskës kanë bombarduar dhe rrethuar disa qytete dhe fshatra. Luftimet kanë vrarë mijëra dhe kanë shkatërruar infrastrukturën, si dhe kanë bërë që miliona të largohen nga vendi. Komentet e Wang u publikuan pas një takimi shtatë-orësh midis zyrtarëve të lartë të SHBA-së dhe Kinës në Romë, në të cilin Uashingtoni tha se SHBA-të kishin shprehur shqetësimin për ‘rreshtimin’ e Kinës pranë Rusisë.

Moska dhe Pekini janë afruar më shumë kohët e fundit, në atë që Uashingtoni e sheh si një aleancë gjithnjë e më armiqësore të fuqive autoritare bërthamore.
Pekini ka refuzuar të dënojë pushtimin e Ukrainës nga Vladimir Putin dhe ka abstenuar nga një votim në Kombet e Bashkuara që thërriste agresionin rus muajin e kaluar.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: