Nga: FATMIRA NIKOLLI*
TIRANE – “Nuk ka notë proteste të Greqisë ndaj nesh për kishën e Dhërmiut. Kjo ka qenë deklarata e ambasadorit shqiptar në Athinë, Dashnor Dervishi, në një intervistë në “Gazeta Shqiptare”. Ai sqaron edhe detajet e një takimi të mbajtur dje në Ministrinë e Jashtme të Greqisë, për çështjen e Shën Thanasit. Takimi ka shpalosur edhe njëherë qëndrimet e dy palëve dhe në fund është folur për ulje tonesh mes dy vendeve.
A ka pasur notë proteste ndaj ambasadës shqiptare në Athinë nga Ministria e Jashtme greke për çështjen e kishës së Shën Thanasit në Dhërmi?
Është përmendur nga mediat. Sot (dje) ka pasur një takim në Ministrinë e Jashtme greke, ku ka qenë e pranishme e Ngarkuara me Punë e Ambasadës, Enkeleda Mërkuri dhe drejtori për Drejtorinë Rajonale në MPJ greke dhe është diskutuar në lidhje me këto ngjarjet e fundit në Dhërmi. Janë shprehur nga të dyja palët qëndrimet tona tashmë të njohura. Jo vetëm verbalisht, por edhe me shkrim. Janë bërë shpjegime, por pa notë proteste.
Kur ka qenë takimi?
Takimi është bërë në mesditë.
Si ka qenë atmosfera dhe klima e këtyre ditëve në Greqi për shkak të kishës?
Shtypin grek e keni ndjekur. Nga ana tjetër, ju dini tashmë edhe tri deklaratat e zëdhënësit të Ministrisë së Jashtme Greke dhe deklaratën e zëdhënësit të Ministrisë së Jashtme shqiptare. Përmbledhja e këtyre deklaratave ka qenë objekt i diskutimit në takimin e së enjtes. Nga pala shqiptare, Mërkuri ka shprehur kundërshtimin tonë të prerë ndaj ndërhyrjeve të Greqisë në punët e brendshme të Shqipërisë, për një çështje siç është prishja e ndërtesës pa leje dhe është sqaruar se aty do të ngrihet një objekt kulti, siç ka qenë, duke e rikthyer në identitet dhe duke e bërë të përshtatshme për besimtarët e zonës. Nga ana tjetër, drejtori i Ministrisë së Jashtme të Greqisë ka shpjeguar arsyet e kësaj ndërhyrjeje, duke e konsideruar sipas tyre, një mbështetje për minoritetin grek të zonës. Më tej, nga pala shqiptare është kundërshtuar me forcë mënyra e shprehjes në deklaratën e fundit të Ministrisë së Jashtme greke, ku u bënë krahasime fare pa vend.
E keni fjalën për krahasimin që ju bë ngjarjes së Himarës me aktet xhihadiste?
Po, krahasime tërësisht pa vend. Nuk bëhet fjalë për një objekt historik apo kulturor, bëhet fjalë për një ndërtim-ngrehinë pa leje, sikundër është sqaruar tashmë, ku do të ngrihet një kishë siç ka qenë. Krahasimet janë tërësisht pa vend, theksoj. Së fundmi u shpreh nga të dyja palët dëshira për të ulur tonet, për të mos u bërë pre e polemikave dhe retorikave pa vend. Do të vazhdojmë dialogun dhe komunikimin në të ardhmen mbi bazën e parimeve të bashkëpunimit dhe mirëkuptimit reciprok, edhe mbi ato baza që janë diskutuar në vizitën e fundit të ministrit të Jashtëm grek në Tiranë.
Zëdhënësi i Ministrisë së Jashtme greke është shprehur se vendimet e Greqisë kundrejt Shqipërisë dhe të komunitetit ndërkombëtar do të bëhen me dije në vijim. Në dijeninë tuaj, a ka nga Greqia ndonjë ankesë në institucionet ndërkombëtare për këtë çështje?
Në dijeninë time, jo dhe nuk kam asnjë njoftim zyrtar. Kjo gjë nuk u tha as në takimin e sotëm (djeshëm). Mediat raportojnë se kjo do të përshkallëzohet dhe se kjo ndodhi, do t’u bëhet me dije vendeve të BE dhe institucioneve të BE. Edhe nëse ndodh, kjo nuk përbën risi, sepse Greqia ka kohë që e bën, jo vetëm për ne, por edhe për fqinjë të tjerë dhe partnerët ndërkombëtarë janë mësuar me këtë. Tashmë, Shqipëria është e pranishme në këto organizma dhe e kemi mundësinë të bëjmë shpjegimet e nevojshme, të cilat në fakt janë të qarta: shembja e një ndërtimi pa leje, ku do ngrihet një objekt i kthyer në identitet. Nuk ka të bëjë me pronë private, as me objekte kulti.
A mendoni se kjo situatë e krijuar mund të ndikojë negativisht për shqiptarët që jetojnë në Greqi, sikundër ka ndodhur më herët?
Nuk besoj. Duhet të them se qeveria aktuale ka një qëndrim mjaft solidar dhe nuk i ngatërron marrëdhëniet e ngjarjet sporadike me qëndrimin ndaj emigrantëve. Praktikisht kohët e fundit kjo është vërtetuar me qëndrime të ndryshme. Nuk mendoj se do ketë reagime negative ndaj shqiptarëve si në të kaluarën. Mund të përmend faktin që dje (pardje), ka dalë një qarkore e Ministrisë së Brendshme të Greqisë, ku futet në fuqi ligji i miratuar së fundmi në Parlamentin grek për dhënien e nënshtetësisë brezit të dytë të emigrantëve shqiptarë.
Si u prit në Athinë vizita e Kryepeshkopit Anastas?
Nuk ka lidhje me Kishën. Kryepeshkopi ka qenë për kurim. Koincidoi që doli nga spitali dhe mori një takim me kryeministrin e presidentin grek, ku u mor në konsideratë puna e tij fetare, roli i tij në fushën e arsimit, edukimit etj. Nuk pati lidhje me ngjarjet e fundit dhe qe një vizitë kortezie. Ai e përshëndeti dëshirën e Cipras për një vizitë në Shqipëri.
(er.nu/Gazeta Shqiptare/BalkanWeb)
