OKB-ja i bëri thirrje të enjten Izraelit të heqë bllokadën e shpërndarjes së ndihmës humanitare në Rripin e Gazës, duke thënë se bllokimi i ndihmës kaq të nevojshme shkakton një “ndëshkim kolektiv mizor”.

“E drejta ndërkombëtare është e qartë: Si fuqi pushtuese, Izraeli duhet të lejojë mbështetjen humanitare. Ndihma dhe jetët e civilëve që ajo shpëton, nuk duhet të jenë kurrë një mjet negociues”, tha në një deklaratë Tom Fletcher, shefi i ndihmës së OKB-së.

Ai tha se bllokimi i ndihmës i lë civilët pa ushqim dhe pa mbështetje mjekësore bazë, duke shtuar se kjo i zhvesh ata nga dinjiteti dhe shpresa dhe “shkakton një ndëshkim kolektiv mizor. Bllokimi i ndihmës vret”.

“Lëvizja humanitare është e pavarur, e paanshme dhe neutrale. Ne besojmë se të gjithë civilët janë po aq të denjë për mbrojtje”, tha Fletcher, duke nënvizuar se ata mbeten të gatshëm të shpëtojnë sa më shumë jetë që të munden, pavarësisht rreziqeve.

“Por, siç e ka bërë të qartë Sekretari i Përgjithshëm i OKB-së Antonio Guterres, modaliteti i fundit i propozuar nga autoritetet izraelite nuk përmbush standardet minimale për mbështetje humanitare parimore”, thuhet në deklaratë.

Fletcher i kërkoi Izraelit të heqë “këtë bllokadë brutale” dhe “të lejojë humanitarët të shpëtojnë jetë”.

“Për civilët e lënë të pambrojtur, asnjë falje nuk mund të mjaftojë. Por më vjen vërtet keq që nuk jemi në gjendje ta shtyjmë bashkësinë ndërkombëtare ta parandalojë këtë padrejtësi.”

Që nga 2 marsi, Izraeli ka mbyllur kalimet kufitare të Gazës, duke bllokuar furnizimet thelbësore nga hyrja në enklavë, pavarësisht raportimeve të shumta për uri në territorin e shkatërruar nga lufta.

Ushtria izraelite e rinovoi sulmin e saj ndaj Gazës më 18 mars, duke thyer një armëpushim dhe marrëveshje shkëmbimi të të burgosurve të 19 janarit me grupin palestinez të rezistencës Hamas.

Të paktën 52,400 palestinezë janë vrarë në Gaza në një sulm brutal izraelit që nga tetori i vitit 2023, shumica prej tyre gra dhe fëmijë.

 

(A.A/BalkanWeb)