KOSOVË

Pavarësisht se sëmundja vdekjeprurëse e coronavirusit, ka përfshirë tashmë pothuajse të gjitha kontinentet e botës, Kosova vazhdon të qëndrojë e paprekur nga ky virus.

Sipas të dhënave të fundit të Institutit Kombëtar të Shëndetësisë Publike të Kosovës (IKSHPK), nga data 8 shkurt deri 1 mars, në Laboratorin e Mikrobiologjisë Molekulare me metodën RT-PCR, janë testuar gjithsej 33 mostra të dyshimta në virusin SARS-CoV-2 (coronavirus) dhe të gjitha kanë rezultuar negative.

Sipas IKSHPK, Nga data 1 shkurt deri me 1 mars nga Aeroporti Ndërkombëtar “Adem Jashari” si dhe pikat tokësore kufitare janë depistuar gjithsej 1,223 udhëtarë. Nga Aeroporti “Adem Jashari” 322 udhëtarë, Vërmicë 367, Merdare 461, Hani i Elezit 22, Dheu i Bardhë 37, Kullë 7 dhe Qafë Morinë 7 udhëtarë.

“Sot, në ANP ‘Adem Jashari’ ekipet mjekësore të aeroportit bashkë me QKMF – Obiliq, Inspektoratin Sanitar të Agjensionit të Ushqimit dhe Veter inës të mbështetur nga ekipi i IKSHP-së kanë kontrolluar të gjithë udhëtarët e ardhur sonte nga Verona e Italisë, sipas protokolleve të OBSH-së dhe ECDC dhe tek asnjëri nuk janë gjetur shenja klinike të sëmundjes”, njofton IKSHPK, transmeton Telegrafi.

Më tej në njoftim thuhet se, udhëtarët janë rekomanduar të qëndrojnë në shtëpitë e veta, të evitojnë kontaktet e afërta me persona, të evitojnë përshëndetjen me shtrëngimin e duarve, të mbajnë higjienën personale dhe larjen e duarve dhe në rast të shfaqjes së temperaturës, kollitjes apo vështirësive në frymëmarrje duhet të paraqiten te mjeku i familjes me historikun e udhëtimit.

Ndryshe, në nivel global deri më 29 shkurt, janë raportuar gjithsej 87,024 raste me coronavirus dhe 2,979 raste të vdekjes.

Në BE dhe Britani të Madhe janë raportuar 1.520 raste me coronavirus dhe 31 raste të vdekjes.

/Telegrafi

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb