Sekretari për Çështjet Zgjedhore në Partinë Demokratike, Ivi Kaso, ka deklaruar se KQZ luajti sot një teatër qesharak me hapjen e disa kutive të votimit. Në një dalje për media, Kaso tha se KQZ nuk ka hapur kutinë e materialeve ku ndodhet lista e votuesve.

Sipas tij, 30 qershori vulosi fatin politik të Edi Ramës, i cili është kryeministri i parë në këto 30 vite që është refuzuar nga 85% e shqiptarëve.

“Sot në KQZ u luajt një teatër qesharak për t’u hedhur hi syve shqiptarëve për të vërtetën e hidhur të 30 qershorit. Për të fshehur manipulimin, KQZ refuzon të hapë kutinë e materialeve ku gjendet lista e votuesve, që deri tani është mbajtur sekret.

Askush nuk ia zgjidh dot Ramës hallin e madh. Fati politik i Ramës është vulos më 30 qershor, ai është kryeministri i parë që refuzohet nga 85% e shqiptarëve dhe shumë shpejt nuk do të jetë më pengesë për fatin e Shqipërisë dhe shqiptarëve”, tha Kaso.

Deklarata e plotë e Ivi Kasos:

Sot, në Komisionin Qendror të Vjedhjeve u luajt një teatër qesharak për t’u hedhur hi syve shqiptarëve për të vërtetën e manipulimit të 30 Qershorit.

Sipas farsës së urdhëruar nga Edi Rama dhe të paralajmëruar nga Partia Demokratike, KQZ-ja hapi disa kuti, për numërimin e të cilave nuk ka patur asnjëherë kontestim nga opozita.

Shfaqja është një sajesë e trashë për të mbuluar manipulimin me shifrat e pjesëmarrjes në votimet moniste të 30 Qershorit. Për të fshehur këtë manipulim, KQZ-ja refuzon të hapë kutinë e materialeve zgjedhore, kur gjendet lista e votuesve.

Duke mos hapur kutinë e materialeve zgjedhore, Komisioni Qendror i Vjedhjeve eliminon mundësinë e vetme për të krahasuar votat e gjetura në kutitë e hapura me listën e votuesve në kutinë e materialeve, e cila mbahet qëllimisht mbyllur.

4 kamikazët e Ramës në KQZ e refuzuan transaprencën, e refuzuan kërkesën e Kryetarit të KQZ-së për të verifikuar listat. Atyre u duhet shoë dhe jo transparencë. U duhet bindje ndaj urdhrit politik dhe jo ndaj ligjit.

KQZ ka detyrim të bëjë transparencë.

Ka detyrimin ligjor t’i vendosë opozitës në dispozicion materialet zgjedhore, të cilat i kemi kërkuar zyrtarisht dhe që na takojne sipas ligjit.

Publikimi i tyre do të hedhë dritë mbi çdo aspekt të farsës zgjedhore të 30 Qershorit, që deri tani është mbajtur sekret.

Asnjë truk prej hajduti nuk ia zgjidh dot Edi Ramës hallin e madh për t’i treguar botës se nuk është ashtu siç duket, pasi është kapur në flagrancë duke mbushur kutitë e votimit.

Fati politik i Edi Ramës është vulosur më 30 Qershor. Ai është kryeministri i parë në këto 30 vjet që refuzohet nga 85% e shqiptarëve dhe shumë shpejt, nuk do të jetë më pengesë për Shqipërinë dhe rrugën e saj europiane.

(BalkanWeb)