Kremlini ka deklaruar të mërkurën se Rusia po ‘mbështet’ aleatin e saj Serbinë në mes të marrëdhënieve gjithnjë e më të tensionuara të vendit ballkanik me Kosovën fqinje për shkak të të shtënave dhe barrikadave të fundit të vendosura.

“Rusia po ndjek nga afër atë që po ndodh dhe se si sigurohen të drejtat e serbëve,” u tha gazetarëve zëdhënësi i Kremlinit, Dmitry Peskov, në kundërshtim të drejtpërdrejtë me një deklaratë nga ministria e jashtme gjermane se grumbullimi i trupave serbe është “i papranueshëm”.

“Ne mbështesim Beogradin në të gjitha veprimet që po ndërmerren”, tha Peskov, por  shtoi se “Serbia është një vend sovran dhe është thelbësisht e gabuar të kërkosh një lloj ndikimi shkatërrues të Rusisë këtu”.

Sakaq, ministri i Jashtëm gjerman Christofer Burger të mërkurën u bëri thirrje serbëve në Kosovë që të heqin barrikadat e vendosura pasi autoritetet kosovare bllokuan hyrjen e Patriarkut serb Porfirije në vend përpara festimeve të Krishtlindjeve Ortodokse.

“Ne jemi shumë të shqetësuar për këto tensione në veri të Kosovës. Barrikadat e ngritura ilegalisht nga serbët e Kosovës duhet të çmontohen sa më shpejt të jetë e mundur”, u tha Burger gazetarëve në Berlin.

“Retorika nacionaliste në veçanti, siç kemi dëgjuar nga Serbia javët e fundit, është krejtësisht e papranueshme dhe rritja e pranisë ushtarake pranë kufirit serb me Kosovën dërgon një sinjal krejtësisht të gabuar. Prandaj presim një qasje konstruktive nga Serbia”, tha ai.