Vazhdojnë replikat mes Greqisë dhe Turqisë në lidhje me emigrantët që kanë mbërritur në kufirin helen. Zyrtarët turq kanë akuzuar autoritetet greke se forcat greke të sigurisë kanë hapur zjarr ndaj refugjatëve dhe madje kanë vrarë emigrantë.

Greqia ka reaguar menjëherë, duke thënë se të tilla akuza janë të pavërteta dhe gënjeshtra të Ankarasë. Sipas Athinës zyrtare, këto janë fabrikime politike dhe se nuk është hapur asnjë lloj zjarri ndaj refugjatëve. Mirëpo, në rrjet janë shpërndarë disa video, ku tregohet sesi ndaj emigrantëve hapet zjarr nga policia greke.  Disa persona mbanin një burrë me batanije, ndërsa ai po përpiqej të shpëtonte nga goditjet.

Njëri nga burrat, duke folur në Farsi, dëgjohet në një video duke thënë që ushtarët grekë kishin qëlluar në këmbët e tyre dhe se pesë migrantë ishin plagosur. Autoriteti lokal në qytetin e afërt të Edirne më pas lëshoi ​​një deklaratë duke thënë se një migrant kishte vdekur në spital dhe pesë ishin plagosur. Ai akuzoi policinë greke dhe njësitë kufitare për hapjen e zjarrit ndaj migrantëve në tokën e askujt, midis truallit helen dhe atij turk.

Zëdhënësi i qeverisë Greke Stelios Petsas ishte i bindur se nuk kishte “asnjë incident të tillë me zjarr nga autoritetet greke” dhe akuzoi Turqinë për “krijimin dhe përhapjen e lajmeve të rreme”. Tre burra nga Afganistani dhe Senegali i kanë thënë Jonah Fisher të BBC-së për një incident të hershëm të martën në mbrëmje, në të cilën thanë se panë dy sirianë të qëlluar në qafe dhe kokë. Burrat thanë që kjo ndodhi ndërsa ata u përpoqën të kapërcejnë lumin në Ipsala, rreth 120 km (75 milje) në jug të Edirnesë.

Lumi Evros tani është fortifikuar fort, me forcat greke të sigurisë çdo disa metra, raporton korrespodenti i BBC. Autoritetet Greke i thanë BBC-së që asnjë migrant nuk ishte vrarë, as plagosur.

(d.xh/ Balkanweb)