TIRANË

Kryetarja e LSI-së Monika Kryemadhi ka përshëndetur 10-vjetorin e anëtarësimit të Shqipërisë në NATO duke iu shprehur mirënjohje SHBA-ve, si mbështetja vendimtare për anëtarësimin në NATO.

Ajo shkruan se Shqipëria në këto 10 vite si anëtare e NATO ka dhënë kontribute si kurrë më parë.

Duke vlerësuar Aleancën e Atlantikut të Veriut, Kryemadhi thotë se lufta për mbrojtjen e vlerave të demokracisë është përpjekje sublime për të forcuar NATO-n.

STATUSI I KRYEMADHIT

10 vite më parë, më 1 prill 2009, Shqipëria shënoi ngjarjen më të rëndësishme në historinë e saj moderne, anëtarësimin në Aleancën e Atlantikut Verior.

Sot është dita për të shprehur mirënjohje të veçantë për aleatin tonë strategjik, SHBA, i cili ka qenë mbështetja vendimtare për aftësimin dhe anëtarësimin e Shqipërisë si vend anëtar i NATO-s.

Anëtarësimi në Aleancë e rreshtoi Shqipërinë mes kombeve të tjera partnere që kontribuojnë dhe garantojnë sigurinë kolektive, në funksion të paqes dhe zhvillimit në zonën Trans-Atlantike dhe përtej saj.

Në këto 10 vite, si anëtare e NATO-s dhe pjesë e misioneve të saj paqeruajtëse, Shqipëria ka dhënë kontribute si kurrë më parë.

Forca e Aleancës sot qëndron jo vetëm në kapacitetet e jashtëzakonshme ushtarake e strategjike që ajo zotëron, por para të gjithash në vlerat e demokracisë, të të drejtave të njeriut dhe tregut të lirë, vlera mbi të cilat janë ngritur gjithë sistemet politike të vendeve anëtare.

Prandaj, lufta  në mbrojtje të vlerave të demokracisë, të të drejtave të njeriut dhe tregut të lirë, është përpjekje sublime për të forcuar NATO-n, si organizata më e fuqishme politiko-ushtarake që ka njohur njerëzimi.

Si kryetare e LSI-së, dëshiroj të vlerësoj gjithë kontributin që ka dhënë kjo forcë politike për anëtarësimin e Shqipërisë në  NATO dhe në marrëdhëniet me të, si dhe të garantoj për vazhdimësinë në rritje të këtij kontributi në të ardhmen.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb