Kukësi ka vuajtur sezonin që shkoi për sulmues, sidomos gjysmën e dytë të tij, kur Bakaj është larguar në shkurt dhe sulmuesi i ardhur nga kampionati portugez, Amido Balde, ka qenë jashtë forme, pasi kishte shumë kohë pa luajtur. I gjendur në këto kushte, alternativa e vetme ka qenë Sindrit Guri, i cili e ka mbajtur i vetëm peshën e sulmit dhe ka shkëlqyer në radhët e nënkampionëve, ku ka shënuar plot 20 gola, 16 prej tyre në gjysmën e dytë të sezonit.

Transferimi i Gurit te Ostende dhe largimi i Balde ka lënë një hendek të madh tek ofensiva e Kukësit, pasi verilindorët aktualisht janë pa sulmues. Pakult kërkon me ngut një fantazist dhe dy sulmues qendre. Konkurrimi në Kupat e Europës është shumë i ashpër dhe i vështirë dhe austriaku i ka kërkuar presidentit Gjici dhe drejtorit sportiv Nderim Nexhipi që të jenë agresivë në merkato, pasi ekipi ka nevojë urgjente për 5-6 përforcime, sidomos sulmi. Në kuadër të afrimeve, drejtuesit janë hedhur menjëherë në sulm, por rezultatet deri tani kanë qenë shumë të vakëta. Verilindorët kanë arritur marrëveshjen vetëm me portierin e Kombëtares së Kosovës, Faton Maloku.

DANILO ALVESH
Ish-kapiteni i Flamurtarit, Danilo Alvesh, është lojtar i lirë në treg, por paçka këtij fakti, braziliani ka një tifoz personal dhe ai është trajneri i Kukësit, Peter Pakult, i cili e ka shprehur vlerësimin publikisht para mediave pak javë para përfundimit të kampionatit për brazilianin. Drejtuesit e Kukësit kanë hyrë direkt në bisedime me të, por ato kanë përfunduar shpejt, pasi Alvesh ka kërkuar 8 mijë euro rrogë mujore. Një rrogë të tillë Kukësi e ka paguar në 6 vite vetëm për Pero Pejiçin. Kukësi i ka ofruar 5 mijë, e çdo gjë ka mbaruar me kaq.

SEBINO PLAKU
Thuhet se Kukësi është në bisedime me Sebino Plakun, i cili është një element mjaft i vlefshëm për Kukësin, pasi eksperienca dhe golat e 33-vjeçarit e bëjnë atë një futbollist të kërkuar. Burime pranë palëve thonë për gazetën se futbollistit i janë ofruar në total 50 mijë euro nga Kukësi, të cilët do shpërndahen, 15 mijë euro në dorë dhe të tjerat si rrogë mujore. Por, është Kamza që nuk e lëshon sulmuesin, pasi të njëjtën pagë ia sigurojnë edhe ata. Kështu që vetë Plaku është në dyshime, do qëndrojë te Kamza apo do pranojë ofertën e Kukësit.

SHERIF KALLAKU
Duket se Kukësi është i “dashuruar” me futbollistët e Laçit. Mbas ofertës që presidenti Gjici i ka bërë Harallamb Qaqit, tashmë radhën e ka talenti i ri, mesfushori 20-vjeçar Sherif Kallaku. Mesfushori ka zhvilluar një sezon pozitiv me Laçin, ku ka luajtur për plot 27 takime, 11 prej të cilave si titullar. Specialistë të njohur ia kanë sugjeruar Kukësit mesfushorin. Ndaj, verilindorët kanë shprehur gatishmërinë për t’i bërë një vend në ekipin e tyre 20-vjeçarit, i cili shikohet me sy të mirë nga drejtuesit e Kukësit. Kallaku mendohet që mund të ketë të ardhme, pasi të dhënat i ka të mira. E mbas dy të parëve, Rexhinaldo është një dëshirë e Kukësit. Tani drejtuesit e Kukësit e kanë më të lehtë për ta afruar sulmuesin, pasi ai është lojtar i lirë. Rexhinaldo i ka kërkuar 5 mijë euro rrogë mujore Kukësit e këta të fundit duket se do ia plotësojnë kërkesën sulmuesit. /PanoramaSport http://www.panorama.com.al/sport/kukesi-nuk-permbahet-oferte-danilo-alveshit-jep-50-mije-euro-per-plakun-merkato-edhe-te-laci//