Që në ditën e parë kur u prezantua tek Kukësi, Orges Shehi ishte i vetëdijshëm për objektivat e klubit. Në mënyrë të drejtë për drejtë, presidenti Gjici ia bëri të qartë, se vetëm Kupa e Shqipërisë nuk mjafton për ta konfirmuar, kërkohej edhe titulli, pavarësisht se ky i fundit ishte dhe mbetej një objektiv i vështirë. Shehi dhe pjesa tjetër e stafit drejtues bënë një punë të mirë në pak kohë por sërish shifrat dhe faktet nuk janë në favor të tij.

3 javë përpara fundit, diferenca me Tiranën nuk është zvogëluar, mbetet 4 pikë, vetëm një mrekulli mund të hap edhe një herë çështjen titullin. Nëse titulli nuk ishte ne dorën e tyre, diskutimi ishte ndryshe në Kupën e Shqipërisë, ky ishte një objektiv që duhej arritur me çdo kusht, mundësia e vetme për të zbutur këtë sezon ku sërish u investuan shuma të konsiderueshme. Kukësi dështoi dhe në këtë objektiv të dytë, eliminimi përballë Teutës nuk i ka lënë një shije të mirë presidentit Gjici. Në këto kushte, vetëm me vendin e dytë në tavolinë, vështirë të mendosh se Shehi mund të rikonfrimohet, e shkuara e afërt ka vërtetuar se Gjici nuk është shumë i duruar në këtë pjesë.
(BalkanWeb)