Dje u ndjeva i nderuar kur u ftova nga Shtetet e Bashkuara në një eveniment të cilësuar bisede me kampionet e reformës në drejtësi me të dërguarin special të Departamentit të Shtetit për Ballkanin zotin Matthew Palmer bashkë me pak kolegë të tjerë, të cilët mund të mos bien dakord me mënyrën si shkojnë gjërat politikisht në Shqipëri, por siç e thash në fjalën time dje, biem dakord se reforma në Drejtësi si dhe orientimi pro perëndimor dhe pro amerikan i Shqipërisë është i panegociueshëm.
Vizita virtuale në Shqipëri e Zotit Palmer përfshiu biseda kokë më kokë me Presidentin Ilir Meta, Kryeministrin Edi Rama dhe kreun e opozitës Lulzim Basha. Këtij të fundit zoti Palmer i kërkoi që të rrisë besimin e qytetarëve te rezultati i zgjedhjeve, pra me fjalë të tjera të njohë rezultatin e 25 prillit si do që të jetë ai. Ama duket se mesazhet e tij janë lexuar ndryshe nga disa.
Sot kontrollorë ajrorë në kullën e Rinasit kanë uzurpuar këtë kullë duke ndërprerë trafikun ajror në Shqipëri dhe ulje-zbritjen në Rinas, ardhjen e pasagjerëve ardhjen e vaksinave. Për më tepër kanë pezulluar operacionin përgatitor të stërvitjes më të madhe ushtarake të NATO-s në historinë e Ballkanit që do të fillojë një ditë pas zgjedhjeve, pra në 26 prill.
E thënë ndryshe kjo grevë, që dukshëm ka sfond politikën të ndikojë dhe tensionojë fushatën elektorale ka dhe pasoja në sigurinë kombëtare, në imazhin e vendit në veprimtarinë e NATO-s dhe është kundër interesave të Shteteve të Bashkuara. T’i marrim gjërat me radhë për t’i kuptuar më mirë.
Së pari AlbControll nuk është një kompani shtetërore por SHA, pra vepron me vetëfinancim. Të ardhurat ndahen në 3 pjesë, njëra i shkon Eurocontrollit në Bruksel që kontrollon tërë hapsirën ajrore evropiane ku bën pjesë dhe AlbControl.
Pjesa e dytë i shkon shtetit. Pjesa e tretë i mbetet AlbControl, i cili me këto të ardhura siguron pagesa super të larta për të gjithë stafin, ku më të paguarit janë kontrollorët ajrorë të kullës së Rinasit, ata të cilët u futën sot në grevë. Rroga e tyre shkon mesatarisht 5000 dollarë. Ata punojnë 1 ditë dhe pushojnë 2 ditë.
Mesatarisht 2 muaj në vit i kalojnë në trajnime jashtë shtetit, në Bruksel, Luksemburg, Spanjë. Kontrollorët shqiptarë nuk janë gjeni, por janë njerëz normal si ne, por hyjnë në këtë vend kryesisht me teser partie PS, PD, dhe sigurisht LSI. Tek ta investohet dhe ata kalojnë shumë teste brenda dhe jashtë vendit. Qëllimi është që ata të mos çmenden dhe mos bëhen të përdorshëm nga politika, apo largqoftë në organizata të rrezikshme.
Për shkak të rënies së trafikut ndërkombëtar ajror dhe për shkak të pandemisë disa prej tyre kanë shkuar në shtëpi përkohësisht, por janë paguar gjatë gjithë kësaj kohë me gjysmë page. Duke parë televizor e duke ngrënë pica janë paguar me mbi 2500 dollarë çdo muaj në kohë krize dhe pandemie.
Megjithatë problemi nuk është këtu. Këto kontrollorë kanë të drejtën për të kërkuar atë që ju takon, por jo për interesa politike dhe aq më pak në kurriz të Shqipërisë dhe shqiptarëve dhe për me keq, jo në kurriz të aleatëve perëndimor.
Sipas disa burimeve, Ambasada Amerikane ka kërkuar ndërhyrjen e shtetit dhe marrjen në kontroll te kullës së kontrollit. Ndaj, nëse keni parë sot ushtri dhe polici në Rinas mos mendoni se ka bërë Rama në kokën e vet, por këtu ama dikush tjetër po tenton t’i bëjë gjërat në kokën e vet, pavarësisht mesazheve që merr nga amerikanët.
Pro ndërprerjes së grevës dhe ndërhyrjes së qeverisë u deklarua në mënyrën e tij edhe Lulzim Basha sot. Kreu i shtetit Ilir Meta mbajti një tjetër qëndrim. Ai zbehtë tha se greva nuk ishte zgjidhje dhe ndërkohë sulmoi në mënyrë agresive qeverinë edhe sot pasdite në Vlore.
Ama në Vlorë u duk se Presidenti i bëri dalje kësaj kryengritje të kontrollorëve të ajrit. A thua ta ketë kuptuar më në fund mesazhin e zotit Palmer. Zoti Meta bëri publike disa javë më parë takimin me këta kontrollorë, ku shumica prej tyre i përkasin partisë së tij.
Ndoshta sot ishte momenti që ai t’u thoshte atyre të ktheheshin në punë, sepse me siguri ato dëgjojnë më shumë atë. Ndoshta dhe kjo kryengritje do të përfundojë dhe aty ku e nisi, në Presidencë. Një ish-drejtuesi i kësaj agjensie më pat treguar se në qershor të vitit 2007 dy ditë para mbërritjes së Air Force One dhe Presidentit George H. W. Bush, kulla e kontrollit ne RINAS u mor në kontroll nga ushtria amerikane.
Marinsat përzunë stafin shqiptar dhe u thanë atyre të kthehen pas 48 orësh. Për 2 ditë rresht amerikanët kontrolluan trafikun ajron mbi Shqipërinë. Kulla e kontrollit dhe teknologjia e saj është një investim strategjik amerikan dhe ç’ka shihet në ekranin në Rinas shihet në kohë reale në një tjetër ekran në Amerikë.
Hapësira Shqiptare ajrore kontrollohet, apo kontrollohet në mënyrë të dyfishtë nga një bazë ushtarake e NATOS në Spanjë.
Pra, me këtë grevë askush nuk mund të luajë pa marrë parasysh rrezikun që e pret. Disa prej këtyre kontrollorëve ndoshta do të përballen me burgun, ironikisht edhe për shkak të ndryshimeve në kodin penal për pandeminë të bëra dhe të firmosura nga vetë Ilir Meta.
Urdhëruesit e tyre politik të kësaj kryengritje sigurisht do të kenë tashmë një llogari tjetër të hapur shtesë me Amerikanët. Sigurisht, sikur të mos mjaftonte ato që ata kishin dhe gjithçka besoj motivohet nga fushata elektorale, ku duket se sërish shqiptarët do të duhet të zgjedhin, jo për programet dhe kandidatët më të mirë, por për drejtimin që duhet të marrë Shqipëria.
Drejtimin perëndimor apo atë tjetrin qorr të shtrembër dhe të orientuar në horizontin e gabuar. Shembullin e dha sot kulla e Rinasit, ajo i mbeti sërish SHBA-ve. Siç thuhej dikur në një film shqiptar, një mesazh për beqiranët, kulla e barit nuk do të digjet.
