Deklarata për një dashuri të fortë familjare, por edhe ekspozim i një miks kulturave të trevave shqiptare.

Kështu zgjodhi Albina dhe familja Kelmendi të paraqiten në “tapetin e bruztë” në Erovizion.

Albina tërhoqi vëmendje me sharmin e saj, duke plotësuar një tablo të ëmbël së bashku me nënën, babanë, vëllain dhe dy motrat e saj.

Këto detaje tërhoqën jo pak vëmendjen e mediave ndërkombëtare dhe organizatorëve të “Eurovizion”, që kishin drejtuar të gjithë prozhektorët e tyre nga Albina.

Këngëtarja përfaqësuese e Shqipërisë në festivalin më të rëndësishëm evropian të këngës do të performojë në gjysmëfinalen e 11 majit, ndërsa shanset për një klasifikim në vendet e para të renditjes përfundimtare janë tepër të larta.

“Jemi krenarë që po përfaqësojmë Shqipërinë, të cilën gjyshi ynë e deshi aq shumë”, është shprehur Albina në një intervistë të shkurtër për prezantuesit e njohur, Timur Miroshnychenko dhe Sam Quek.

(BalkanWeb)