ELBASAN
Ministrja e Arsimit, Sportit dhe Rinisë Evis Kushi, Kreu i Grupit Parlamentar Socialist Taulant Balla, përfaqësues të Zyrës Vendore Arsimore dhe Njësisë Vendore të Kujdesit Shëndetësor Elbasan panë nga afër procesin e vaksinimit të mësuesve të Elbasanit.
Ata ishin pranë ambienteve të shkollës 9-vjeçare “Jorgji Dilo” të këtij qyteti, të cilat janë kthyer në hapësira për vaksinimin e mësuesve.
Ministrja Kushi, duke i cilësuar mësuesit si heronjtë tanë të sakrificës, të cilët, që nga dita e parë e pandemisë nuk e kanë ndalur punën e përkushtimin në shërbim të nxënësve e procesit mësimor, shprehet se është: “E lumtur që procesi është futur në rrugë të mbarë dhe shpresëplotë që do të kontribuojë në një rikthim të shpejtë në normalitetin që duam”.
Ndërsa drejtuesi Politik i Partisë Socialiste për Qarkun e Elbasanit, Taulant Balla tha se në të gjithë qarkun e Elbasanit vaksinimi i mësuesve po ecën me ritme të shpejta dhe brenda një kohe të shkurtër do të imunizohen të gjithë mësuesit, në mënyrë që mësimi të zhvillohet në kushte normale.
Sa i përket pezullimit të vaksinës AstraZeneca në disa shtete, Balla tha se nëse do të verifikohen do të rezultojnë lajme të rreme.
“AstraZeneca po përdoret gjerësisht në Britaninë e Madhe, ku vetë kryeministri u vaksinua. E certifikuar nga institucionet ndërkombëtare kjo vaksinë nuk le vend për dyshime për cilësinë dhe efikasitetin e saj”, deklaroi Balla.