Sekretari i përgjithshëm i LSI, Endrit Braimllari në përfundim të Konventës Kombëtare ka paraqitur propozimin e një grupi anëtarësh të Konventës, për ndryshimin e emrit të partisë nga Lëvizja Socialiste për Integrim në Partia e Lirisë.
Po ashtu u propozua që pas paraqitjes edhe të dorëheqjes të Kryetares së LSI, Monika Kryemadhi, krijimi i Komitetit Organizator, me në krye Ilir Metën.
“Komiteti Organizator, ngarkohet nga Konventa Kombëtare, për drejtimin e partisë dhe përfaqësimit të saj në të gjitha nivelet.
Komiteti Organizator do të drejtojë veprimtarinë e partisë për përgatitjen e Konventës Kombëtare, që do të mbahet brenda dy muajve. Drejtuesi i Komitetit Organizator të jetë zoti Ilir Meta dhe zëvendës Kryetar të jetë zoti Agim Nesho. Këto ndryshime hyjnë në fuqi menjëherë”, tha ai.
Kujtojmë se Meta i ndryshoi edhe emrin LSI-së, duke e quajtur Partia e Lirisë. Ai ka treguar se emri “Parti e Lirisë”, është frymëzuar nga populli i 2 Marsit dhe fakti që në Shqipëri është kërcënuar liria e qytetarëve.
(BalkanWeb)