Pa kaluar ende pesë minuta nga shpallja e rezultateve paraprake nga Albana Vokshi, makina tip Benz ku ndodhej Sali Berisha u fut në selinë blu. Ai doli nga makina, u përshëndet me militantët në oborrin e partisë dhe me vet Albana Vokshin e cila kishte dalë në katin e parë për ta pritur.
Së bashku me stafin e tij, Berisha u ngjit në një nga zyrat e katit të dytë ku qëndroi rreth 10 minuta, kohë e mjaftueshme kjo që militantët të mbushnin sallën ku ai do të fliste para kamerave.
Pak pas orës 23:00 Berisha doli para mediave. Ai theksoi se do e Shqipëria ndodhet në një regjim që nuk e meriton dhe se shpejt do të shpëtojnë prej saj.
“Kam një përulje të madhe dhe një mirënjohje të pa kufijshme për të gjithë ata burra dhe gra, djem e vajza, që në një hark kohor ngadhënjyen si njerëz të lirë në një proces që do të regjistrohet në historinë e shqiptarëve si mrekullia e 8 e shekullit të 21. 31 vite më parë, një mik i madh i kombit tonë në vizitën e tij historike, James Bekker do u thoshte shqiptarëve se ju do të jeni të lirë të zgjidhni udhëheqësit tuaj. Anëtarët dhe anëtaret e PD, njerëz të lirë, të idealeve fisnike, bënë historinë në një proces të mrekullueshëm. Ndaj dhe mirënjohja shkon drejt të gjithë atyre.
Kam mirënjohje të pa kufijshme për anëtarët dhe anëtaret që sot këtë ditë të 22 majit lanë të gjitha obligimet dhe votuan për të zgjedhur si qytetarë të lirë kryetarin e tyre, kryetarin e PD. Ky besim, i jashtëzakonshëm i tyre është për mua detyrim i madh. Detyrim shumë i madh, por unë kam bindjen se së bashku me ju ne do t’ja dalim. Ne jemi në mision. Jemi burra e gra, djem e vajza, që kemi për mision proceset që njohu PD t’i njohë e gjithë shoqëria shqiptare dhe të shpëtojmë Shqipërinë nga një regjim që nuk e meriton. Mirënjohja ime shkon te të rinjtë shqiptarë. Duhet ta pranojmë. Ishin ata promotorët kryesor të kësaj lëvizje. Betimi im para tyre dhe mbarë shqiptarëve do të bëj gjithçka që ëndrrat e tyre më të bukura të bëhen realitet në këtë vend.
Ai që realizon ëndrrat e tij, është pafundësisht i detyruar të bëj gjithçka për realizimin e ëndrrave. Më pak se një vit më parë, në këtë sallë, diku në qoshe gazetarët më pyetën: ‘Çfarë mendon për rikthimin tënd dhe a parashikon Berisha të rikthehet në krye të PD? Përgjigja ime ishte kjo: Kurrë mos thuaj kurrë”, tha Berisha.
Kujtojmë se Berisha siguroi në këtë garë 40.820 vota, e përkthyer në përqindje, 93.45%.
Nga ana tjetër, kandidati Ibsen Elezi mori 2532 vota, e thënë ndryshe 5.8%.
(BalkanWeb)
