Presidenti i vendit, Ilir Meta ka dekretuar sot 4 ministrat e rinj të propozuar nga kryeministri Edi Rama.
Kështu Anila Denaj, dekretohet në vend të Arben Ahmetajt si ministre e Financave dhe e Ekonomisë, Besa Shahini, ministre e Arsimit në vend të Lindita Nikollit, Belinda Balluku dekretohet si ministre Infrastrukture në vend të Damian Gjiknurit dhe Elva Margariti, ministre e Kulturës në vend të Mirela Kumbaros.
Kreu i shtetit ka dekretuar të gjithë emrat e ministrave të rinj të propozuar nga Rama, me përjashtim të ministrit të Jashtëm Ditmir Bushatit, i cili nuk është dekretuar si i shkarkuar nga Meta dhe emri i Gent Cakajt vijon të jetë i pautorizuar për të zënë postin e Ministrisë së Jashtme.
Me dekretet e sotme, Meta ka hapur dritën jeshile për ministrat e rinj të zgjedhur nga kryeministri Edi Rama, i cili ndryshimin e tyre e njoftoi në Asmablenë Kombëtare të 28 dhjetorit të vitit të kaluar.
Emri i Gent Cakajt i propozuar nga kryeministri Rama për ministër të Jashtëm ka hasur në kundërshtime të ashpra mes aktorëve politikë shqiptarë, ndërsa vetë Meta është shprehur se për emrin e Cakajt në krye të Ministrisë së Jashtme do të shprehet brenda afateve që parashikon dekreti dhe ligji themeltar i shtetit.
Ndërkohë me 5 janar, kreu i shtetit vendosi të dekretojë tre ministra dhe zv.kryeministrin. Kështu Erion Braçe do të mbajë postin e zv.kryeministrit, Elisa Spiropali do ushtrojë postin e ministres për Marrëdhëniet me Parlamentin, Blendi Çuçi, ministër i Bujqësisë dhe Zhvillimit Rural dhe Eduard Shalsi, ministër i Sipërmarrjes dhe Biznesit.
(n.m/BalkanWeb)
