Presidenti francez Emmanuel Macron tha se presidenti rus Vladimir Putin po bënte një “gabim të ri” pas njoftimit të tij për një mobilizim të pjesshëm të qytetarëve për të forcuar luftën në Ukrainë të mërkurën.

“Mendoj se vendimi i marrë gjatë orëve të fundit nga Presidenti Putin është një gabim i ri”, tha Macron në anglisht.

“Mendoj shumë qartë se ajo që na nevojitet është paqja dhe një armëpushim”, shtoi ai.

Macron, i cili po merr pjesë në Asamblenë e Përgjithshme të Kombeve të Bashkuara në Nju Jork, shtoi se vendimi i Putinit “për të rritur nivelin e luftës… është një lajm i keq për popullin rus, është një lajm i keq për të rinjtë rusë dhe është një lajm i keq për Rusinë, sepse ai do të rrisë izolimin e vendit të tij.”

Presidenti francez vuri në dukje se Kina dhe India kishin shprehur të dyja shqetësimet për luftën. “Sot, Rusia është gjithnjë e më e izoluar dhe është gjithnjë e më shumë e përkushtuar ndaj një lufte që vetëm [Rusia] e dëshiron dhe që është e paligjshme”, tha Macron.

“Të gjithë bëjnë thirrje për paqe. Askush nuk i kupton më zgjedhjet e bëra nga Rusia”, shtoi ai.