Gjendet i pajetë një shtetas italian në Kavajë. Gazetari Kelment Baçi raporton për “BalkanWeb” se italiani banonte në lagjen nr. 2 të Kavajës, në katin e gjashtë të një pallati, dhe ishte i martuar me një shqiptare prej më shumë se 20 vitesh.

Siç raporton gazetari Baçi, ai i kishte humbur kontaktet me familjarët e tij në Itali që prej orën 08:15 të mëngjesit të sotëm, ndërsa nuk ju është përgjigjur thirrjeve të tyre në telefon.

Viktimë mësohet se është shtetasi Xhuzepe Klemente, rreth 70 vjeç, i cili mësohet se kishte pasur probleme të shumta shëndetësore në të kaluarën.

Në trupin e viktimës nuk ka shenja dhune dhe dyshimet e para janë që ai mund të ketë ndërruar jetë për shkak të ndonjë sulmi në zemër. Gazetari Baçi thekson për “BalkanWeb” se i moshuari italian kishte lënë amanet para se të ndahej nga jeta që të varrosej në Shqipëri.

Ndërkohë, trupi i pajetë do të dërgohet te morgu i Tiranës, pasi është nënshtetas i huaj.

(BalkanWeb)

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb