Rrugë të boshatisura, pa makina, disa qytetarë që lëvizin më këmbë, pa ndotje, diell dhe pranverë. Po të mos ishte koronavirusi, Shqipëria sot do të ofronte një pamje të mrekullueshme si kurrë më parë. Shqiptarët që dhe për në kafe marrin makinën, duket se i janë dorëzuar masave të qeverisë kundër koronavirusit.

Nga Tirana, në Fier, në Lezhë e Dibër, ja si paraqitet situata në rrugët e vendit.

Lezha i bindet urdhrit për t’u mbrojtur nga koronavirusi, në rrugët e qytetit vetëm mjetet e policisë

Edhe Lezha i është bindur urdhrit të qeverisë për ndalim qarkullimi. Rruga kryesore ka marrë një pamje të frikshme ku përpos policisë , nuk shihet asnjë automjet. Rruga kryesore ka marrë një pamje të frikshme ku përpos policisë, nuk shihet asnjë automjet.

Gazetari Elidon Ndreka raportoi për “BalkanWeb” se edhe mjetet që do lëvizin do kenë një kontroll të rreptë nga ana e policisë dhe forcave të ushtrisë. Karburantet, furrat e bukës dhe farmacitë janë të hapura!

Masat ndaj koronavirusit/ Rrugët e shkreta, paralizohet lëvizja në Dibër
Megjithëse vendimi për paralizimin total të qarkullimit të mjeteve është marrë për Tiranën e Durrësin, edhe në rrugët ndërqytetase në Qarkun Dibër janë të boshatisura.
Gazetari Enver Doçi raportoi për “BalkanWeb” se aksi nacional Peshkopi – Burrel është i boshatisur si kurrë më parë. Megjithëse në këtë aks lëvizin në ditë mijëra mjete, sot nuk kishte asnjë të tillë në drejtim të Burreli apo Klosit.

Por gjatë ditës së djeshme ka pasur një dyndje të qytetarëve të Tiranës që ju janë drejtuar rretheve. Shumë qytetar janë kthyer në vendlindjet e tyre pas vendimit të dalë për ndalimin e lëvizjeve në Tiranë e Durrës nga ora 6 e mëngjesit të kësaj të premteje deri në mesnatën e së dielës.

Koronavirusi/ Fieri i zbrazët, qytetarët asnjë lëvizje, bizneset e mbyllura
Qyteti i Fierit është zgjuar sot i qetë dhe me rrugë pothuajse të zbrazura. Nuk ka pasur lëvizje të automjeteve ndërsa bizneset kanë qenë të mbyllura.

Është ndoshta hera e parë që qyteti i Fierit është i izoluar. Gazetari Ervis Kuçi raportoi për “BalkanWeb” se hapur janë vetëm disa farmaci, furra buke, por edhe markete.

Policia është ndërkohë në akset kryesore të qytetit ndërsa vijon thirrja ndaj qytetarëve për të qëndruar në shtëpi.

(BalkanWeb)