TIRANE

Deputeti demokrat, Xhemal Gjunkshi në një deklaratë për mediat ka  vijuar me akuzat për  dhënien me koncension të ujërave termalë në “Llixhat e Peshkopisë”.

Sipas tij, banorët  e Dibrës presin anulim të menjëhershëm të këtij koncensioni, ndërsa shton se ata kanë edhe mbështetjen e PD-së.

Gjunkshi në fjalën e tij u shpreh se deputetja socialiste, Almira Xhembulla dhe kryetari i Bashkisë, Muharrem Rama së bashku me prefektin Nexhedin Shehu, pavarësisht pretendimeve të banorëve  bëjnë ‘të paditurin’.

Deklarata e plotë

Prej disa ditësh, Partia Demokratike ka denoncuar aferën e dhënies me koncesion të ujërave termale “Llixhat e Peshkopisë”. Ne jemi angazhuar të jemi në krah të banorëve në protestat e tyre dhe këmbëngulim deri në zbardhjen e plotë të kësaj afere dhe nxjerrjen e përgjegjësve që janë përzier në të. Ky koncesion i dhënë pothuajse njësoj, me të njëjtat praktika korruptive, si tenderat e koncesionet e Unazës së Re apo HEC-eve duhet të anulohet dhe personat përgjegjës të vihen përpara drejtësisë.

Partia Demokratike siç ka mbështetur banorët e Astir-it prej afro 80 ditësh, do të mbështesë banorët e Llixhave dhe qytetarët e Dibrës deri në anullimin e këtij konçesioni. Pas denoncimit tone publik dhe protestës së organizuar nga banorët para bashkisë së Peshkopisë, banorët e llixhave janë takuar me deputeten e Partisë Socialiste, znj. Almira Xhembulla, e shoqëruar nga kryetari i Bashkisë, Muharrem Rama, Prefekti e Dibrës, Nexhmedin Shehu, duke u shfajësuar para qytetarëve sikur s’dinin gjë kur ndërkohë vendimi është i datës 11.12.2018. Këto deklarata janë një mashtrim i pastër dhe që nuk garantojnë anulimin e procesit. Përfaqësuesit e mazhorancës nuk mund të luajnë të paditurin, kur i gjithë dokumentacioni që firma ka dorëzuar në Shkodër është siguruar nga Bashkia e Dibrës, nga prefektura e Qarkut si dhe nga zyra e regjistrimit të pasurisë Dibër. Si nuk ditkan gjë përfaqësuesit e mazhorancës kur bashkia vetë ka patur përfaqësuesit e vet në Këshillin e Basenit Ujor Drin – Bunë? Si ka mundësi që përfaqësuesit e mazhorancës luajnë të paditurin, kur në këtë komision ka qenë pjesërmarrës i vëllai i deputetit socialist, Ulsi Manja. Procedura korruptive e koncesionit, e miratuar me date 11.12.2018, cënon drejtpërsëdrejti interesat e mbi 3500 banoreve te qytetareve dibranë dhe favorizon interesat korruptive te Qeverise Rama. Me kete aktivitet jane te lidhur mbi 35 hotele, mbi 200 shtepi pritëse (biznese familjare). Banorët e Dibrës e dinë mirë se nëse Qeveria Rama do kishte qenë e përgjegjshme dhe dashamirëse me Dibrën, do i kishte anulluar edhe HEC-et e Çidhnës dhe nuk do e shkatërronte Kanionin e Setës, ashtu siç ka thënë se do të anullojë HEC-et mbi Vjosë apo ato të Kanionit të Holtës. U bëjmë thirrje institucioneve vendore dhe qeverisë “Rama” të mos mendojë se mund t’i mashtrojë dibranët përkohësisht, duke thënë se s’kishte informacion. Banorët e Dibrës presin anullimin e menjëhershëm të procedurës së koncesionit, përndryshe s’do t’i ndalojnë protestat dhe do të identifikojnë me emër dhe me mbiemër mashtruesit që po i shpronësojnë dhe po luajnë me jetën e tyre.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb