Për fakultetin e drejtësisë në universitetin “Luarasi” është shumë e rëndësishme që profesionistët e së drejtës si juristët, gjyqtarët dhe prokurorët e ardhshëm të marrin njohuri mbi të drejtat e njeriut që në fillim të ciklit të tyre të arsimimit.
Universiteti “Luarasi” ftoi Qendrën Europiane dhe Rrjetin për Shtetin e së Drejtës së Ambasadës Holandeze për të zhvilluar një trajnim dy ditor me studentët e drejtësisë mbi lirinë e shprehjes, të drejtën për informim dhe gjuhën e urrejtjes.
Sipas ekspertes së të drejtave të njeriut Ina Xhepa, projekti ka si qëllim thellimin e njohurive teorike dhe praktike të studentëve të drejtësisë, mbi Konventën Evropiane të të Drejtave të Njeriut dhe jurisprudencën e Gjykatës së Strasburgut.
Pedagogia Dorina Gjipali, përgjegjëse e Departamentit Publik në Fakultetin e Drejtësisë tek “Luarasi” shprehet se trajnimi intensiv, ka qëllim përmirësimin dhe thellimin e njohurive të studentëve të drejtësisë, si juristë të ardhshëm, mbi Standardet Europiane për të Drejtat e Njeriut.
Duke e lidhur trajnimin e studentëve me aktualitetin, pedagogia thotë se në shoqërinë shqiptare, gjuha e urrejtjes ka ndikime negative në përditshmëri madje edhe me pasoja fatale. Qendra do të organizojë trajnime dy ditore edhe në universitete të tjera të drejtësisë në Shqipëri dhe Kosovë.